Shillong, Rymphang, 22: U Dr Aman War uba long u Director barim jong ka Health Services (MI) ha ka sngi Saitjaiñ u phah ïa ka shithi iehnoh kam kum u Secretary jong ka United Democratic Party (UDP).
Ha ka shithi ba la phah sha u President jong ka UDP u Bah Metbah Lyngdoh, u Dr. War u la pynpaw ba u la iehnoh ïa ka jinglong dkhot na ka UDP bad na ka kam kum uwei na ki Secretary hapoh ka party.
“Nga la shah jied kum u Rangbah Shnong ba thymmai jong ka Lachaumiere Dorbar bad da ka mynsiem ba sngewkhia nga kyrpad ïa phi ban mynjur ïa ka jingiehnohkam jong nga kham kloi,” la pynpaw u Dr. War.
“Ka jingkyrshan bad ka jingai mynsiem jong phi ïa nga ban ïakhun ïa ka elekshon MLA ba ladep na ka party ha North Shilong Constituency, kan pynsah jingkynmaw ïa nga. Nga pynpaw ïa ka jingsngewnguh shi katdei eh ïa kane. Nga kyrmen ba ka UDP kan nang kiew shaphrang bad ka lawei jong ka ruh kan nang phyrnai,” la pynpaw shuh shuh u Dr. War.
