Shillong, Jymmang, 21: Ki nonglute kiba shim kabu ïa ka jinghap jong u slap uba jur ki la rung hapoh kawei ka jaka sei pisa ATM jong ka State Bank of India (SBI) ha ka shnong Mawkriah, East Khasi Hills bad rong ei ïa ka pisa kumba T. 28.13 lak hadien ba la ot ïa ka mashin thep pisa.
Katkum ka ejahar ba la ujor da u Himangshu Borgohain sha ki Pulit ka Mawngap Police Station u la pyntip ba ka pisa ba la shah tuh na kane ka ATM ka long T.28,13,100 bad kumjuh ruh wat ïa ka e-surveilance ki runar ki la pynjot.
Ïa ka video ba la ïohring ïa ka kam jong ki nonglute la aiti sha ki Pulit ka Mawngap. Kane ka la jia ha ka sngi Balang ha ka por kumba 2:43 baje mynstep.
U Superintendent of Police ka East Khasi Hills Bah Vivek Syiem u la ïathuh ba kane ka lah ban dei ka kam runar jong ki briew kiba wan nabar jong ka jylla.
Katkum ka jingtohkit jong ki Pulit la ïathuh ba ka rukom pyndonkam jong ki nongtuh ban sei ïa pisa na ka ATM ka long thik kumba la ha ki katto katne ki bynta jong ka jylla Assam, kaba pynpaw ba ki nonglute ki lah ban don jingïadei bad kane ka jingjia.
Ha kaba ïadei bad kane, ki Pulit ki la register case ha Mawngap Police Station bad ka jingtohkit ka dang ïaid shakhmat ban ithuh dur bad ban ïohkem ïa ki nonglute.
