Shillong, Nailar, 19: Lai ngut ki MLA jong ka seng Congress ha ka Lah Sngi u Blei ki la leit ban pynïasoh ïalade bad ka National Peoples Party (NPP).
Arngut na kine ki dei ki MLA ba la sospon haduh 6 snem kynthih da ka Meghalaya Pradesh Congress Committee (MPCC) ba kynthup ïa u MLA ka Nongstoiñ u Bah Gabriel Wahlang bad u MLA jong ka Mawhati u Bah Charles Marngar bad u President barim ka MPCC u MLA jong ka Umsning u Dr Celestine Lyngdoh.
Mar ïa poi ha ophis treikam jong ka NPP, la pdiang sngewbha ïa kine ki lai ngut da u National President jong ka NPP u Conrad K. Sangma uba long ruh u Myntri Rangbah ka Jylla Conrad ryngkat ka jingsakhi lang jong ki nongïalam bahakhmat ka NPP.
Da ka jingryngkoh jong kine ki lai ngut sha ka NPP, ka Congress mynta ha Meghalaya ka don sa tang ïa uwei u MLA, kata u Bah Ronnie V. Lyngdoh na Mylliem Constituency bad ha ka Ingdorbar Thawain kaba 60 ngut ki dkhot.
Shwa ban leit pynïasoh sha ka NPP, kine ki lai ngut ki la leit ban aiti ruh ïa ka shithi ba ki la mih noh na ka Congress sha u Lamphang jong ka Ingdorbar Thaw Aiñ ka Jylla Thomas A Sangma
Lyngba ka jingpynïasoh jong kine ki lai ngut ki MLA ka Congress, ka NPP mynta ka don 31 ngut ki MLA hapoh ka Ingdorbar Thawain ka jylla kaba 60 ngut ki dkhot.
