Shillong, Naiwieng, 11: Ka shnong Lyngkhoi kaba hap hapoh East Khasi Hill District ryngkat bad ki paidriewngeit jong ka Balang Catholic, ha ka Lah Sngi u Blei ki la ai khublei khatduh ïa u shipai Aibok Madur uba la khlad noh ha ka 7 tarik, Naiwieng, 2024 ha Siachen Glacier kaba don ha ka jylla Jammu & Kashmir.
Hadien ka jingkhlad noh, ïa ka met jong u shipai Aibok Madur la pynkit noh sha ïing kmie ha ka 9 tarik, Naiwieng, 2024 ha ka shnong Mawbri, Ri Bhoi District bad sha ka iing khun la pynpoi ïa ka met ha ka sngi u Blei bad la tep donburom ha ka Lah Sngi u Blei ha u lum jingtep jong ka Balang Catholic ha ka shnong Lyngkhoi.
Nalor ka jinglehniam da ka Balang Catholic, la leh don burom khatduh ruh da ki shipai ka Assam Regiment Centre (ARC) ïa u shipai Aibok Madur ha ka jingsakhi lang jong ki paidbah kiba la wan ban sngewlem halor ka jingkhlad noh jong u bad tang shu kut ka jinglehniam ïa ka synduk ba la pynthiah ïa ka met jong u shipai Aibok Madur la shimti hi da ki shipai Assam Regiment Centre (ARC) ban pynkit sha u lum jingtep.
Kum ka dak ban ai khublei khatduh ïa u shipai Aibok Madur, ki khynnah skul bad ki paidbah ka shnong ha shilynter surok ki la ap ha ryngkat bad ki lama India ban ai khublei khatduh ïa une u shipai jong ka ri.
Ynda la poi sha lum jingtep la pynlong biang ïa ka jinglehniam bad ka jingleh burom da ki shipai bad ynda la thep ïa ka synduk hapoh ka thliew lum jingtep ki shipai ka Assam Regiment Centre ki la siat suloi sa lai sien sha suiñ ban ai khublei khatduh.
Ha kane ka sngi la wan sngewlem ruh da u Additional Deputy Commissioner jong ka East Khasi Hill u Bah P.T Passah, na ophis jong u Block Development Officer ka ka Sohiong C&RD Block, na ka ophis u Deputy Commisisoner ka Ri Bhoi District bad la pule ruh ïa ka shithi sngewlem na u Myntri Rangbah ka jylla u Conrad K. Sangma bad na ka Dorbar shnong Mawbri.
