Shillong, K’lyngkot, 02: Ka Kynhun Myntri jong ka Sorkar Jylla ha ka sngi Thohdieng ka la mynjur ia ka jingtyrwa ban pynjlan ia ka samoi treikam jong ka Khasi Hills Autonomous District Council (KHADC) bad Jaintia Hills Autonomous District Council (JHADC) sa hynriew bnai.
Ka samoi treikam jong kine ki artylli ki Autonomous District Council (ADC) kan kut noh ha ka 5 tarik, Lber, 2024 bad ka jingpynjlan ia ka samoi treikam kaba hynriew bnai kan sdang naduh ka 5 tarik Lber, 2024.
Ka jingpynjlan ia ka elekshon jied MDC thymmai ha kine ki ar tylli ki Council ka long namarba ki la kyrpad ban pynjlan ia ka jingaipor ia ki Delimitation Committee.
Ha u snem 2023, u Lat ka Jylla u la aibor ia kine ki ar tylli ki Autonomous District Council ba kin thung ia ka Delimitation Committee ban pynbeit ryntih ia ki MDC Constituency jong kine ki ar tylli ki council katkum ka jingdon jong ki nongshong shnong.
U Symbud Myntri Rangbah uba peit ia ka tnat District Council Affairs ka Sorkar Jylla, Bah Prestone Tynsong ha ka jingïakren bad ki lad pathai khubor u la ong, “dang shen ki ar tylli ki Autonomous District Council ki la phah ia ka jingtyrwa sha ka Sorkar Jylla ban pynjlan shuwa ia ka jingtreikam jong ki Delimitation Committee.”
Da kane ka rai ba la shim da ka Sorkar, ia ka elekshon MDC jong ka KHADC bad JHADC la pynjlan mynta sa hynriew bnai.
U Bah Tynsong u la iathuh ba ka Sorkar kan sa phah ia kane ka jingai jingmut sha u Lat ka Jylla u Phagu Chauhan ba un ai ia ka jingmynjur.
