Shillong, ïaīong, 14: Hadien ba ka KSU ka la dep ia kynduh ia u MP ka Shillong Parliamentary Constituency, Dr. Ricky A. J. Syngkon, ha ka Lah Sngi U Blei ki nongialam ka seng ki la ia kynduh sa ia u MP ka Tura Parliamentary Constituency Saleng Sangma ha iing sah jong u.
Hapog ka jingialam u President u samla Lambokstarwell Marngar ka KSU ka la pynsngew ha u Saleng Sangma ia ki kynrum kynram ha ka rukom thungkam ha NEIGRIHMS hapoh ka jingpyniaid u Director u Dr. Nalin Mehta bad kyrpad na u MP ba un sngewbha ban pynpeit ia kine ki kynrum kynram bad ba ka rukom thungkam ka dei ban iaid katkum ki jingai jingmut ka seng khnang ba ki samla wad kam ka jylla kin ioh jingmyntoi.
Napdeng shibun tylli ki mat ba ka seng ka la ioh ban syllok bad u MP, ka KSU ka la kdew kham bniah halor saw tylli ki mat kaba ka sngew ba dei ban pynkylla bad pynwandur na ka bynta ka jingmyntoi kiba bun balang bad khamtam ia ki riewlum ba dei na Meghalaya.
Ka KSU ka la ban ba ka jingthungkam ha ka Nursing dei ban mang da ka bhah ba 80:20 kaba mut 80 na ka 100 dei ban ai ia ki kynthei bad 20 na ka 100 dei ban mang ia ki shynrang.
“Watla u Director ka NEIGRIHMS u la kob ba ym ju don kum kata ka kyndon ban mang 80:20 ha ka kam Nursing hynrei ka KSU ka don ki sakhi sabut ba kiwei ki hospital sorkar pdeng kum ka AIIMS bad kiwei kiwei ki pyntreikam ia kum katei ka rukom bhah kam. Shuh shuh ka Governing Council jong ka NEIGRIHMS ka don ka iktiar ban pyntreikam ia katei ka kyndon ha NEIGRIHMS. Ka KSU ka sngew ba ka jingbym don katei ka kyndon bhah 80:20 ka wanrah jingeh shibun ia ki nongpang bad nongtrei ha NEIGRIHMS bad kane lah ban sakhi ha kaba kiba bun mynta ki nurse ha NEIGRIHMS ki dei ki shynrang kiba dang shu shah thungkam shen bad jan baroh kine ki wan na ka jylla Rajasthan kaba wanrah ia ka jingkylli ba kumno kine ki nong Rajasthan ki ioh suk ban trei ha NEIGRIHMS. Shuh shuh ka jingbym ia pei ha ka ktien ka thylliej hapdeng kine ki nurse shynrang na Rajasthan bad ki nongpang ka wanrah jingeh shibun ia ki nongshah sumar ha NEIGRIHMS,” la ong ka seng ha u kyrwoh ba la phah sha ki lad pathai khubor.
Kaba ar ba ka KSU ka la pynsngew ha u MP ka long halor ka jingpynhair ia ka rta ki nongthep kam na ka 35 sha ka 30 ka ban khanglad ia shibun ngut kiba thmu ban thep kam ha NEIGRIHMS. Ka seng ka sngew ba dei ban pynneh beit ia ka rta khanglad ha ka 35 snem.
Kaba lai ka long halor ka jingduna ka bhah na ka bynta ki riew trai jylla (Scheduled Tribes) bad ka seng ka sngew ba dei ban kyntiew shuh shuh ia ka bhah na ka bynta ki riewlum namar ha jylla Meghalaya 85 na ka 100 ki dei ki riewlum.
Kaba saw ba ka KSU ka la pynsngew ka dei halor ka jingbuh ia ki jaka ia leh eksamin ka NEIGRIHMS shabar jong ka jylla ha kaba ki jaka ki bun ki long kiba jngai bad kane ka pynduh lad ia shibun ki nongialeh eksamin khamtam kito kiba wan na ki longiing ba duna ka ioh ka kot.
Ha u snem baladep ka KSU ka la leit ban tuklar halor kane ka jingbuh ia kita ki examination centres shaduh sha Jorhat, Kolkata, Delhi bad kiwei kiwei ki jaka ba sha jngai bad u Director u la kular ba ha u snem ba bud un pyrshang ban buh noh ia ki examination centres hapoh Meghalaya. Mynshem snem ha kane ka jingiakren ki nongialam ka seng bad u Director, ki dkhot ka seng ki la pynsngew ba ka jingbuh ia ki centres sha jngai kan ktah ia kiba bun ki nongthep kam hynrei u Director u la kynthoh kylla pynban ia ki nongmihkhmat ka jylla da kaba ong ba lada por ilekshon ki lah ban pynlut pisa ban pynbiang kali por ialap ilekshon ne iaid rally ki dei ruh ban pynbiang kali ia ki nongthep kam ha NEIGRIHMS kiba ngat ban ialeh eksamin shabar jylla.
Na ka liang u Saleng Sangma hadiwn ba u la iohsngew ia ki jingujor ka seng, u la kular ba un shimkhia 100 na ka 100 ban pyrshang pynurlong ia kitei ki jingujor ka seng.
U la pyntip ruh ba u la pyrshang ban ia kynduh ia u Dr. Nalin Mehta ha kine ki khyndiat sngi hynrei u Director u la shim shuti haduh 20 tarik u Iaiong 2025 kaba dei ruh ka sngi ba khatduh ban plie ia ka jingthep kam. Ka KSU ka sngew ba kane ka jingshim shuti u Director haduh katei ka sngi ka dei ka jingleh shutia jong u ban lait ban ai jubab lane ban hap pynbeit ia ki kynrum kynram halor ki kyndon thungkam ka NEIGRIHMS ha shwa ka 20 tarik u Iaiong.
“Ka jingleh arsap utei u Director ka la pynbor ia u Saleng Sangma ban ia syllok mar mar bad u Dr. Ricky AJ Syngkon bad kine ki ar ngut ki MP ka jylla ki la rai ban pynsngew noh mardor sha u Union Minister of Health ka ri India bad ban dawa ia u ba u dei ban tuklar halor ki jyrwit jyrwat ka thungkam ha NEIGRIHMS,” la kynnoh ka KSU.
Na ka liang kine ki ar ngut ki MP ruh ki la pynsngew ba lada ym lah ban pynbeit ia kitei ki kynrum kynram dei ban pynjlan shwa ia ka advertisement ka NEIGRIHMS bad kin ym ailad ia ki kam buituh utei u Director uba la phet bak na jylla ban lait ia pynbeit ia kitei ki kynrum kynram kiba ktah mationg ia ka jylla baroh kawei.
Khatduh, ka KSU ka kwah ban pynpaw paidbah ia ka jingthok jingshukor u Director ka NEIGRIHMS da kaba u pynmih khubor ba ka thungkam thungjam hapoh NEIGRIHMS ka iaid katkum ki riti treikam ka Department of Personnel & Training (DoPT) jong ka sorkar pdeng.
Ka seng ha ka por ba ka ia kynduh ia utei u Director ka la kdew ia ka jingbymbeit ka roster register, ka jingbym biang ki backlog vacancies, hynrei u Director um shym la lah ban pynshai ia kitei ki jingduna. Wat ha ka shithi ba jubab ia ka KSU ka NEIGRIHMS kam shym la lah ban pynshai halor kitei ki mat. Ka KSU ka sngew ba lehse une u briew u thmu ban wanrah beit da ki briew lajong ban trei hapoh NEIGRIHMS. Ka KSU ka ioh jingtip ruh ba u Nalin Mehta u ju pyntieng ia ki nongtrei ha NEIGRIHMS ba kim bit ban kren pyrshah ia u ioh kan ktah ia kam ka jam jong ki hi. Ka KSU ka sngew ba ka sorkar jylla kam dei ban leh Pontius Pilatus ha kane ka kam namar ba wat lada ka NEIGRIHMS ka dei ka shlem jong ka sorkar pdeng hynrei ka don pat hapoh jylla Meghalaya bad ka sorkar jylla ka don hok ban tuklar ha katei ka shlem lada don kano kano ka kynrum kynram khamtam kaba ktah ia trai jylla namar kiba bun hi kiba leit sumar ha katei ka shlem ai jingsumar ki dei kiba na Meghalaya.
