Shillong, Jylliew 28: Ka Meghalaya State Olympic Association (MSOA) ha ka kynti ka la pynkhreh ban pynlong biang sa ia ka 3rd Sohra Half Marathon kaba 21 kilomitar ha ka 14 tarik, Nailur, 2024.
“Kane ka Half Marathon ka long ha ki lai bynta na ka bynta ban kyntiew ia ki kam shangkai pyrthei, ban khring ia ka jingmut jingpyrkhat jong kiba bun bad ka jingiakob mareh ka dei kaba la mynjur bad ai laisen da ka Athletic Federation of India (AAI),” la iathuh u Working President jong ka MSOA Bah John Kharshiiing ha ka jingiakren bad ki lad pathai khubor.
U la pynshai ruh sha ki paidbah, khamtam sha ki kmie ki kpa, ba la phia ia ka rta na ka bynta ki nongiashim bynta ha ka jingiakob mareh, kata, kiba 16 snem, 17 snem shaneng katba kiba dangrit ka rta kim lah ban shim bynta ha ka ki jingiakob mareh.
U la iathuh ba kin bun bha ki nongiashim bynta ki ban sa wan nabar ka ri India mynta ka kynti.
“Ka jingangnud jong ngi ka long ba kane ka marathon kan long kum ka Boston Marathon, kaba khring da ki phew hajar kiba ia shim bynta na kylleng ka pyrthei,” ong u Bah Kharshiing.
U la pynpaw ruh ba ka MSOA ka la ai jingkyrshan ia kiba leit ialehkai shabar lyngba ka “Yes Meghalaya Program”.
U General Secretary jong ka MSOA Bah Finely Pariat, u la iathuh ba ka Sorkar Jylla ka la mynjur ia ka mang tyngka ha ka iakob mareh kaba 5k, 10k bad ia ka 21k bad la kyntiew ruh ia ka khusnam da ka song pisa na ka 1 lak sha ka 2 lak tyngka.
Ka jingiakob mareh kan don ha ka kyrdan bapher bapher bad kum ka dak jingpynshlur ia kiba 60 snem kiba pyndep ia ka jingiamareh kaba 21k jong kiba 50 snem shaneng yn ai da ka khusnam song pisa, ym donkam ban jop, hynrei sha kiba pyndep ia ka jingiamareh kaba 21k.
Ia ki khusnam da ka song pisa la kyntiew pynheh lut ha ki kyrdan mareh ki bapher bapher, u la ong.
Ha ka 14 tarik, Nailur, 2024 yn sa khang ia ka surok ha ka por ba pynlong ia ka jingiakob mareh ha Sohra.
