Shillong, Naitung 11 : Na ki 365 ngut ki phetwir nong Manipur kiba wan phet rieh sha Meghalaya na ka daw ka jingiakynad ha ka jylla Manipur kaba la sdang ha u bnai Jymmang, mynta ki don sa tang 77 ngut kiba dang sah ha kane ka Jylla khamtam ha nongbah Shillong, la iathuh ka Deputy Commissioner ka East Khasi Hills ka Kong R.M. Kurbah.
Ha ka jingiakren bad ki lad pathai khubor ha ka sngi ba-ar, ka Kong Kurbah ka la pyntip ba katkum ka jingkheiñ ba la ïohlum kiba sah mynta ki long satang 77 ngut katba kiwei pat ki la leit phai noh bad don ruh kiba leit sha kiwei ki jylla jong ka Ri.
“Na kiba wan phet rieh bad sah shipor ha nongbah Shillong ki la leit sha Aizawl, sha Delhi, sha Bangalore bad katto katne pat ki la leit phai sha Manipur,” ka la ong.
Bun na kiba la wan phet rieh sha kane ka jylla ha ka por ba don ka jingkynad ki la ïoh jaka sah ktem shipor ba la pynbiang da ka Evangelical Baptist Convention Church bad da ka Chin Baptist Association.
U Additional District Magistrate, Bah Ronnie Wahlang haba ai jingtip halor ka jingwad jingtip ia ka jingdon jong ki phetwir naduh kaba sdang jong u bnai Jymmang, u la ong, ha ka jingkynduh bad ki bor shnong ryngkat ki Pulit la ban pynbeit ba kin lah ban leit phai da kaba suk ba sain sha ki jaka ba ki kwah ban leit.
“Ia mynta hi, ki don sa tang 77 ngut ki briew kiba dang sah ha Shillong bad bun na ki, ki leit sah bad ki bahaiing hasem, bad ki paralok bad ruh don ruh kiba dang pule ki la ioh jaka sah ha ki Hostel namar ki dang kwah ban bteng ïa ka jingpule jong ki hangne ha Shillong,” u la ong.
U la ïathuh ruh ba u Dy.SP u la leit hi dalade mynta ka sngi baar ban iakynduh ïa ki bor pynïaid jong ka CDA bad CBCC ban pyntikna la ki dang don ne em ki briew kiba dang sah ha ki jaka sah shipor.
“Hynrei ka kaiphod kaba ngi ïoh na u Dy. SP ka long ba ym don shuh. Kumta kine ki 77 ngut ki long katkum ka jingai jingkhein ba la ai ma ki hi bad ki jingtip baroh shaphang kitei ki briew ki don lut bad ngi hangne naduh ki number phone bad ngi dang ïai bteng ban buddien ïa ki la ki don ne em kino kino ki jingeh ba ki kynduh la ka long jaka sah, ban ïoh jaka pule, jaka sah ne kino kino ki jingeh ba kin pyntip khnang ban pyntikna ba kin ïoh ban im da kaba suk kaba saiñ.”
U Superintendent of Police ka East Khasi Hills, Bah Sylvester Nongtnger haba bynrap lang, u la ong na ka liang jong ki Pulit hapoh ka jingïalam jong u DGP dang shen ki la pynlong ka jingkynduh lang hapdeng ki Meitei bad ki Kuki bad kyntu ba kin pynneh ïa ka shongsuk shongsain katba ki dang sah ha Shillong.
U ong ruh ba ki Pulit ki kular ruh ban ai ka jingïada ïa baroh arliang kynhun lada donkam. Ki bor synshar distrik ki la pynpaw ruh ka jingsngewnguh ïa ka Dorbar Shnong Lapalang kaba naduh ba sdang ba wan phetwir na ka jylla Manipur ka la ai jingïarap da ki marbam.
