Shillong, Nailar, 03: Ka Khasi Students Union (KSU) East Jaintia Hills District Unit kaba la hiar jurip ïa ka jinglong jingman jong ka surok National Highway-6 ka la lap ba ka jingshna ïa kane ka surok da ka National Highway Authority of India (NHAI) ka dang sah khongreng bad haduh mynta ym pat lah satia ban shna pyndep kumba la khmihlynti da ki paidbah nongleit nongwan.
Ha u kyrwoh ba la phah sha ki lad pathai khubor ryngkat bad ki video, ka seng ka la ïathuh katba ki dkhot ka KSU ki dang leit talasi ïa ki mynder ri sha ka shnong Ratachera ha ka 25 tarik, Naitung, 2025 ki la lap ba ka surok naduh Lumshnong shaduh Ratachera ka la shu sah khongreng khlem da pyntrei shuh bad shuh shuh la ïathuh ba wat tang kawei ka mashin ruh ym don satia.
Ka seng ka la pynpaw ba ka surok ha ki bynta jong ka shnong Kuliang, Donaskur, Ratachera bad Malidor ka sniew bha bad nalor kata ka la pynsyrtok ruh haduh katta katta wat ïa ki kali kiba leit ba wan na kane ka surok.
