Shillong, Nailar, 24: Ki Pulit ka Jylla Meghalaya kin sa pynngat kyndon lehse mynta ka taïew pyrshah ïa ka Sonam Raghuvanshi, ïa u Raj Kushwaha bad ïa ki san ngut kiwei pat kiba donkti ha ka jingpynïap beiñ ïa u Raja Raghuvanshi, u nongkhaïi na Indore, Madhya Pradesh ha ka 23 tarik, Jymmang ha Sohra.
U Additional Public Prosecutor Tushar Chandra u la ïathuh ba ka jingtohkit halor kane ka jingjia ka la jan dep artat bad ïa ka jingpynngat kyndon yn leh hapoh lai bnai ba la buh por naduh ka sngi ba la kem ïa kiba donkti ha u bnai Jylliew.
U la bynrap ba ïa kiba donkti la khmih lynti ban tian bishar biang ha Kashari ha ka 27 tarik lane 28 tarik mynta u bnai.
Kiba la shah kem halor ka jingshah pynïap u Raja Raghuvanshi ki long ka kurim jong u, ka Sonam Raghuvanshi, u Raj Kushwaha, bad lai ngut kiwei pat ki nongïarap ba la tip kyrteng kum u Anand Singh Kurmi, u Akash Rajput bad u Vishal Singh Chauhan.
Kine ki san ngut haduh mynta ki dang shah set ha along namarba ka jingbishar ka dang ïaid shakhmat haduh mynta.
Nalor kine, ki Pulit ki la kem ruh ïa ki lai ngut kiba donkti ban buhrieh bad ban pynduh pyndam ïa ki sakhi sabut kiba kynthup ïa u trai iing u L. Tomar, u nongkhaïi iing u Silome James, bad u Security Guard ba la tip kyrteng kum u Balbir Ahirwar kiba la lait jamin.
Ka jingpynïap jong u Raja Raghuvanshi, ka la pynkyndit ïa ki paidbah ka jylla Meghalaya, bad ki Pulit ki shim ba kane ka jingjia ka dei kawei na ki jingpynïap briew kaba shyrkhei haduh katta katta.
