Shillong, Jymmang, 26: Ka la mih ka jingkynnoh pyrshah ba ki nongtrei jong ka Civil Hospital Nongpoh ki shu trei torti bad trei tang dep ïa la kamram ba la bynshet ha ki.
Kane ka jingkynnoh ka la jia hadien ba kawei ka longkmie kaba la leit ban kha khunlung hapoh kane ka hospital bad tang hadien katto katne sngi eiei ba ka la mih na Hospital u kynphad u la mih katba kane ka longkmie ka dang leit shabar.
Halor kane ka jingjia, ki nongïalam jong ka Khasi Student Union (KSU) Nongpoh Circle, ha ka Lah Sngi u Blei ka la leit ban ïa kynduh ïa ka Medical Superintendent jong ka Civil Hospital Nongpoh ka Dr. D Blah ban pan jingpynshai halor kane ka jingjia.
Kum ban shu pyntip hangne, ha ka 10 tarik Jymmang, 2025 kane ka longkmie kaba sah ha ka shnong Umden Manipur, Ribhoi District ka la leit ban kha ïa i khunlung ha Civil Hospital Nongpoh bad mih noh na kane ka hospital ha ka 14 tarik Jymmang, 2025. Hynrei tang hadien katto katne sngi eiei ba la mih na kane ka jaka sumar, kane ka longkmie katba ka dang leit shabar la mih pynban da u Kynphad ba la pyndonkam ha ka por ba sumar ïa ka.
U Asst. Secretary ka KSU Nongpoh Circle u samla Rishot Lapang u la ïathuh ba ha ka jingïakren, ka Dr. Blah ka la kular ban phah pynlong ïa ka jingtohkit khnang ban lap ïa ka jingleh bakla na ka liang jong ki nongsumar ha kane ka hopspital.
