Shillong, Nailur 26: U Lat ka jylla Meghalaya, C H Vijayashankar u la ong ba ka Swasth Nari Sashakt Parivar Abhiyaan ka dei ka sienjam ba kongsan ban pynkhlaiñ ïa ka koit ka khiah jong ki longkmie, ka jingpynkupbor ïa ki longïing bad ka jingtei ïa ka ri kaba kham biang ha ka koit ka khiah.
Haba ai jingkren ha ka Health Camp ba kyrpang ha Barapani State Dispensary, Ri Bhoi District mynta ka sngi, u Lat u la ong, “Ka Swasth Nari Sashakt Parivar Abhiyaan, kaba la plie paidbah da u Myntri Rangbahduh ka ri ha ka 17 tarik Nailur 2025, ka dei ka sienjam kaba kongsan ban pynkhlaiñ ïa ka koit ka khiah jong ki longkmie, ka jingpynkupbor ïa ki longïing bad ka jingtei ïa ka ri kaba kham biang ha ka koit ka khiah.”
U Lat u la pynpaw ba kane ka prokram kam sahkut ha tang ka jingai jingsumar, namar ka thmu ban pynkupbor ïa ki kynthei ha ka shnong ka thaw bad ka pynthikna ba ki jingshakri ha ka koit ka khiah kin poi da kaba suk sha ki kmie, ki khynnah bad ki samla pule.
Ha ka jingleit jngoh jong u, u Lat u la ïakren bad ki nongïoh jingmyntoi bad sam ïa ki song jingbam sha ki longkmie ba armet bad ïa ki sanitary pad sha ki khynnah kynthei kiba dang khie samla, da kaba pynpaw biang ïa ka jingdonkam jong ka jingbam bad ka jingleh khuid na ka bynta ki khynnah kynthei kiba dangkhie samla. U la pynshlur ïa ki kmie ban shim ïa ki lad jingsumar na ka bynta jong ki bad ki khunlung jong ki, da kaba ong ba ka koit ka khiah jong ki kmie bad ki khun ka long kum ka nongrim na ka bynta ka imlang sahlang kaba kiewshaphrang.
U Lat u la leit jngoh ïa ki stall ba la buh da ki tnad Tuberculosis (TB), Non-Communicable Diseases (NCD) bad kiwei kiwei ki tnad kiba trei ha ki kam kiba ïadei bad ka koit ka khiah, da kaba ai jingsngewnguh na ka bynta ki sienjam ai jingïada ba la shim da ki kynhun ai jingsumar.
Haba pynpaw ïa ka jingsngewkhia halor ka jingjur jong ka jingpang Cancer bad Tuberculosis ha Meghalaya, u la kyntu ïa ki heh jong ka tnad ka koit ka khiah, ki nongtrei shnong, bad ki paidbah ban ïasnohktilang ban ïakhun ïa kine ki jingeh. Shuh shuh u la bthah ïa u Deputy Commissioner bad ki heh jong ka tnad ka Koit ka Khiah ba kin pynthikna ba ki jingmyntoi jong ka Abhiyaan kin long kiba lah ban ïoh da ki paidbah baroh ha kylleng ka district.
Ha ka jingkren jong u, u Lat u la ong ba ka jingjop jong ka Swasth Nari Sashakt Parivar Abhiyaan ka shong ha ka jingïashim bynta lang, ha kaba ka sorkar, ka imlang sahlang, bad ki longïing ki ïatreilang na ka bynta ka jylla Meghalaya kaba koit ba khiah.
U Lat u la ïaroh ïa ka jingtrei shitom jong ki bor pynïaid District, ka tnad ka Koit ka Khiah, ki doktor, ki nurse, ki nongtrei ASHA bad ki nongtrei kiba ai jingshakri na ka bynta ka jingaiti lut jong ki ban wanrah ïa ka jingsumar kaba bha bad ka jingpynsngewthuh sha ki paidbah. U la pynpaw ka jingsngewskhem ba da ka jinshimkhia jong ki, ki jingthmu jong ka Abhiyaan kin urlong ha ka Jylla.
