Shillong, Nailar 09: Ka Ramakrishna Mission Vivekananda Cultural Centre, Quinton Road, Shillong, mynta ka sngi ka la pynlong ïa ka prokram sam khusnam jong ka bynta kaba 51 jong ka Annual Cultural Competition, kaba long ruh kum ka jingpynkut ïa ka jingrakhe kaba shi bnai ïa ki sap, ka bor saiñdur jong ki samla bad ruh ka jinghiar pateng ka deiriti.
Ha ka jingïakhun mynta u snem la ïashim bynta da 2,811 ngut ki khynnah na 82 tylli ki skul na Shillong bad ki jaka ba hajan ka sor, ha kaba ka jingïakhun ka la long naduh ka kyrdan ki khynnah nursery haduh ki khynnah kolej. Ha kane ka prokram, 285 ngut ki nongjop ki la ïoh ïa ki khusnam, ki syrnot bad ki jingïaroh. Army Public School, Shillong, ka la long ka lahduh katba ka Pine Mount School ka la wan ba ar.
Ha kane ka sngi la wan ïashim bynta da ka Kong Rosetta Mary Kurbah, IAS, Deputy Commissioner, East Khasi Hills, Shillong, kum ka Kongsan. Ka la kdew sha ki kyntien jong u Swami Vivekananda ha kaba ka la ong, “Ka dei ka deiriti kaba ïaineh katba dang ïaid ka por,” bad ka la kdew sha ka bynta kaba khraw jong kum kine ki jingïakhun ban kyntiew ïa ka mynsiem bad ruh ban wanrah ïa ka jingieid ïa ka deiriti ha kylleng ka India.
U Symbud Kongsan, Amit Kumar Gupta na ka India Tourism, ka tnad Kam Jngoh Kai, Shillong, u la ïaroh ïa kane ka Mission kaba la pynlong ïa ka jingïakhun kaba heh haduh katne katne, kaba ai ka rynsan ïa ki samla ba kin pyntbit shuh shuh ïalade.
Ha shuwa kane, u Swami Divya swarupananda Maharaj, Assistant Secretary jong ka Ramakrishna Mission, Shillong, u la ai ka jingkren pdiang sngewbha bad u Swami Vedeshananda Maharaj u la ai ka jingkren ai jingsngewnguh.
Ka bynta kaba 51 jong ka Annual Cultural Competition ka la pyni biang ïa ka jingkut jingmut ka Mission na ka bynta ka jingkyntiew ïa ki samla, ka jingpyni ïa ka sap saiñdur bad ka jingpynneh ïa ka deiriti jong ka thaiñ. Ka jingshitrhem jong ki nongïashim bynta bad ka jingïashim bynta ki nongwan peit ka la pynlong ïa kane ka jingïakhun kum kawei na ki kam ba kongsan ha Shillong kiba ïadei bad ka deiriti.
