Shillong, Risaw 24: Ïa ka Rozgar Mela kaba 17 la pynlong mynta ka sngi ha State Convention Centre, Shillong, kum shi bynta ka sienjam ha ka ri baroh kawei ban plie ki lad ïoh kam na ka bynta ki samla.
Palat 58 ngut ki samla la aiti ïa ki shithi thungkam ha ki tnad sorkar pdeng bapher bapher, ba kynthup ïa 16 ngut ki kandidet ha ka Tnad Post, 3 ngut ha NEEPCO, 2 ngut ha ka CRPF, 27 ngut ha ka Tnad Rel, bad 10 ngut ha ka State Bank of India.
Ha kane ka sngi u Myntri Khynnah ka sorkar pdeng ba dei khmih ïa ka Tnad External Affairs & Textiles, u Pabitra Margherita u la plie ïa ka jingïalang kum u kongsan. Ha ka jingkren jong u, u Pabitra Margherita u la pynkynmaw ïa ka jingwan ïashim bynta ha ka bynta kaba 15 jong ka Rozgar Mela ha kane ka juh ka jaka hynriew bnai ba la leit bad u la ïaroh ruh ïa ka jingshitrhem kaba dang ïai bteng hapdeng ki samla ka jylla Meghalaya.
“Ka pyndap ïa nga da ka jingsarong bad jingsngewkmen kaba khraw ban don hangne sa shisien. Tang hynriew bnai mynshwa, nga la ïashim bynta ha ka bynta kaba 15 ha kane hi ka jaka, bad ka long kaba pynkmen ban ïohi ïa kajuh ka jingkyrmen ha Meghalaya mynta ka sngi,” la ong u Margherita.
Haba pynpaw ïa ka jingktah jong kane ka sienjam ha ka ri baroh kawei, u la bynrap ba naduh ba la sdang ïa ka Rozgar Mela ha ka 22 tarik u Risaw 2022, palat shi million tylli ki shithi thungkam la sam ha kylleng ka ri, kaba la pynwandur thymmai ïa ka jinglong ka ïoh kam ïoh jam jong ka ri India.
“Ka jingpynleit jingmut jong ka sorkar ha ka jingpynmih ki lad ïoh kam ïoh jam bad ka jingkyntiew ïa ki sap treikam kam pat ju long kaba khlaiñ. Ki sienjam kum ka Employment-Linked Incentive (ELI) Scheme, ka jingpynkiew kyrdan ïa ki Industrial Training Institute, bad ki lad ki lynti kiba thymmai hapoh ka Skill India Mission ki plie lynti ïa ki million ngut ki samla nong India,” u la ong.
U la ong shuh shuh ba tang ka skhim PLI (Production-Linked Incentive) ka la pynmih palat 11.5 lak ki kam, kaba la buh ïa ka nongrim kaba skhem na ka bynta ka jingroi jong ki karkhana bad ka jingpynkupbor ïa ka ïoh ka kot jong ka India.
Haba ai mynsiem ïa ki samla, u la ong, “Uwei pa uwei na phi ba don hangne mynta ka sngi u pyni ïa ka bor bad ka lad jong ka khana jingkiew shaphrang jong ka India. Kynmaw ba man la ka jingpyrshang kaba rit ka kheiñ ïa kawei pa kawei ka bynta kaba phi shim bad uwei pa uwei u nongshong shnong uba phi shakri u long shi bynta jong ka khana jingkylla jong ka India. Nga ai khublei ïa baroh ki kandidet kiba ïoh ïa ki shithi thungkam jong ki mynta ka sngi, bad ïa ki kmie ki kpa kiba la ai ka jingkyrshan kaba la pynlong ïa kane ka jingjop.”
Ïa kane ka prokram la sdang da ka jingkren lyngba ka video da u Dr. Jitendra Singh, Myntri Khynnah ka tnad Science & Technology, bud sa ka jingkren lyngba ka video na u Myntri Rangbahduh ka ri u Narendra Modi, uba pynpaw biang ïa ka jingkut jingmut jong ka sorkar ban pynkup bor ïa ki samla lyngba ki kam kiba neh bad ki lad ki lynti kiba katkum ka jingtbit.
Ha kane ka sngi la don ruh ki kynrem ki lyndan ba kynthup ïa u Sanjiv Ranjan, Director of Posts; u K.V.L.N. Murty, Chief Postmaster General, North East Circle; u Maj Gen. Rajesh Kumar Jha, Director (Personnel), ka NEEPCO; u J.N. U Tusing, Commandant, CRPF; bad kiwei ki heh ophisar na ki tnad treikam bapher bapher.
