Shillong, Rymphang 01: Ka lympung ïalehkai phutbol ba la tip kum ka Samkhamti Winter Vacation ka la poi noh sha kaba kut bad kaba shongshit ha ka sngi Saitjaiñ da ka jingai mynsiem jong ki nongkyrshan ïa ki rang ïalehkai ha la ki jong ki kynhun bad ki jingïalehkai kiba kynthup ha ka kyrdan Under-13, Under-15 bad ha ka Samkhamti Mawdatbaki League ki la long shisha kiba itynnad.
Ki kynhun kiba la poi sha ka jingïakhun phainal ha ka kyrdan Under-13 ki long ka Mylliem Grassroot pyrshah ïa ka Pay For Rights ha kaba ka Pay For Rights ka la lah ban pynliem noh ïa ka Mylliem Grassroot da shi kol la nod. Ha ka kyrdan Under-15 ka Mawlai Grassroot ka la lah ban pynliem noh ïa ka 4 For All da shi kol la nod. Haba phai pat sha ka Mawdatbaki League ka kynhun ïalehkai Umjan ka la long ka lahduh da kaba pynliem noh ïa ka United Comrades da ar kol la kawei.
Ha kane ka sngi la sakhi lang da u President jong ka Seng Samla Mawlai Pyllun u Bah Samuel Biam bad ki dkhot ryngkat ka jingdonlang jong u Bah Hellick Warjri, u Bah Samborlang Diengdoh, ka Kong Khamtilin Massar bad kiwei kiwei.
Na ka liang jong ki nongpynïaid ki la pyntip ba shen kin pynlong noh sa ïa ka lympung ïalehkai jong ki kynthei bad ki Veteran.
