Shillong, Nailar, 14: Ka Yatra, ka kynhun ba ladep rejistar, ka la rai ban weng noh ïa ka jingleit ïaid kjat kaba manla u snem sha krem Mawjymbuiñ ha Mawsynram hadien ba ka Dorbar Shnong ka la pynpaw ba kam lah ban shim ïa kano kano ka rai namar ka jinglyngkot jong ka por.
Ïa kane la pyntip da ka kynhun hakhmat ka Ingbishar Meghalaya High Court, kaba la bthah ban thaw ïa ka komiti ban peit ïa ka rukom pynïaid ïa ka krem Mawjymbuin, ha ka jingshong bishar halor kane ka kam ha ka sngi Thohdieng.
Ha ka hukum, ka Iingbishar ka la ong ba ki nongshah mudui, kiba la ailad shipor ba kin ïapynbeit ïa kane ka kam ha kaba ïadei bad ka jingai ïa ka No Objection Certificate (NoC) na ka bynta ban pynlong ïa ka jingleit ïaid pilkrim kaba ba shisien shisnem sha krem Mawjymbuin, Mawsynram, ki la pynpaw ba kim lah ha kum kane ka khyllipmat ban shim ïa kano kano ka rai namar ka jinglyngkot jong ka por.
U Assistant Rangbah Shnong jong ka shnong Mawsynram u Bah H.Rapsang, uba dei ruh u nongaiktien, u la aiti hakhmat kane ka Iingbishar ba ki pdiang bad tip ïa ka jingshisha ba ka Krem Mawjymbuin ka dei ka jaka jngohkai pyrthei kaba kongsan, nalor ba ka long ka jaka kyntang kaba la burom da kiba bun ki briew na ki jingngeit bapher bapher, pynban u la kyrpad ba khnang ban poi sha ka jingïasngewthuh jingmut kaba biang bad ban pynwandur ïa ki katto katne ki rukom treikam ban ailad ban leit jngoh ïa kata ka jaka da kaba suk, katto katne ki jingïamir jingmut ki long kiba donkam,” la ong ka hukum.
U S. Jindal, u nongïasaid aiñ na ka bynta ki nongmudui, halor ka jingai jingmut jong u Assistant Rangbah Shnong u pynpaw ruh ba la sngewthuh namar ka jinglyngkot ka por, ka lah ban long ba shym la lah ban poi sha ka rai ne ka jingpynbeit, bad ka la mynjur hapoh ki jingbthah, ba na ka bynta une u snem lehse yn pynsangeh noh ïa ka Yatra ba la tyrwa bad ban ap ïa ki jingbthah kiba kham bniah halor kane ka bynta.
“Haba la sngap ïa ki jingai jingmut jong ki arliang mamla mynta ka sngi, ka long shisha kaba sngewsih ba ym shym la lah ban poi sha ka rai ban ailad ïa ka kynhun jong ki nongujor ban pynlong ïa ka Yatra kaba long kaba kyntang ha ka jingngeit jong ki. Kane ka Iingbishar ka kdew ruh ïa ka jingmynjur da ka kynhun ki nongujor ha kane ka bynta ki long kiba kloi ban pynsangeh noh ïa ka Yatra bda ban ap ïa ka jingpynbeit shwa ïa ka kam,” la ong ka Iingbishar ha ka hukum.
Ka Iingbishar ka la bthah ruh ban thaw ïa ka komiti ban peit ïa kane ka kam da kaba buh jingmut ïa ka jinglong kyntang jong ka jaka, ka jingpyrkhat ïa ka mariang bad kumjuh ruh ïa ka niam.
“Namarba kane ka dang dei ban don shwa ka jingbishar kaba bniah shwa ban pynmih ïa ka hukum kaba khatduh, kane ka Iingbishar ka sngew donkam ban thaw ïa ka Komiti ban khmih bniah ïa ka kane ka kam bad kumno ban pynïaid ïa ka krem, da kaba buh jingmut ïa ka jinglong kyntang jong ka jaka, ka jingpyrkhat ïa ka mariang bad kumjuh ruh ka jingpyrkhat ïa ka niam,” ka la ong.
Ka Ingbishar ka la bthah ïa ka Deputy Commissioner jong ka East Khasi Hills District ban tyrwa ïa ki kyrteng jong ki kynhun bad ki briew ne ki kynhun ki ban thaw ïa ka komiti ban bishar bniah ïa kane ka kam bad ban poi sha ka jingpynbeit kaba lah ban pdiang da baroh.
“Ka Deputy Commissioner ka mynjur ban pynbiang ïa ka thup jong ki dkhot ka Committee hapoh shitaiew naduh mynta ka sngi. Katkum kane, la buh sngi ïa kane ka kam ha ka 22 -08 -2024 na ka bynta ban pynbiang ïa ka thup kyrteng bad na ka bynta ban pynmih shuh shuh ïa kiwei pat ki jingbthah,” la ong ka Iingbishar.
Shuh shuh ka Ïingbishar ka la maham tyngeh ïa kito kiba pynsaphriang ïa ki khubor lamler bad ki jingbyrngem ha kaba ïadei bad kane ka kam da kaba bthah ïa u SP jong ka East Khasi Hills ban pynap pahara da ki Pulit ban pynneh pynsah ïa ka krem Mawjymbuin.
“La wanrah shuh shuh sha ka jingtip jong ka Iingbishar ba ki katto katne ki briew bad ki kynhun ki la pyrshang ban pynphriang ïa ki jingkren lamler bad ki jingbyrngem ha kaba ïadei bad ka jingpyndonkam ïa ka jaka kyntang. La buh ha ka jingtip ba kyllum ba lada jia ba kum kane ka jinglamler ka nang saphriang shuh shuh, yn sa shim mardor ïa ki sienjam da kane ka Ïingbishar,” la ong ka hukum.
“Khnang ban kiar na kino kino ki jingjia kiba sngewsih, la bthah ba u Superintendent of Police jong ka East Khasi Hills District ba un bthah ïa u Officer In-charge, Mawsynram ban pynap pahara da ki Pulit na ka bynta ban pynneh pynsah ïa ka jingshngaiñ ha ka krem,” la bthah shuh shuh ka Ïingbishar.
