Shillong, Nailar, 04: Da ki phew ngut ki dkhot jong ka Meghalaya Pradesh Congress Committee ha ka Lah Sngi u Blei ki la rah plakad ban pynrem jur ïa ka jingshah thombor jong ki Khristan ha kylleng ki bynta jong ka ri India khamtam eh hadien ka jingshah kem jong ki arngut ki ki riewniam Sister ka Balang Catholic na ka jylla Kerela ryngkat bad u Sukaman Mandavi ha Bilaspur, Chhattisgarh dang shen halor ka jingpharep lamler da ki dkhot ka Bajrang Dal ba ki dei kiba donkti ha ka kam khaïi briew bad ban pynkylla niam jubor.
Ki arngut ki riewniam Sister, kata, ka Sr. Preethy Mary bad ka Sr. Vandana Francis, kynthup ruh u Sukaman Mandavi ki la lait mih na along ha ka 2 tarik, Nailar, 2025 hadien ba ka Special Court jong ka National Investigation Agency (NIA) ka la ai jamin noh ïa ki.
Ha ka jingïalang kaba la long ha Don Bosco Square, Laitumkhrah,Shillong, ki nongïalam bad ki dkhot ka seng Congress ki la pynrem jur ïa ki kynhun shitniam bad ki la dawa ïa ka Sorkar NDA ba la ïalam da ka BJP ha Delhi ban pynsangeh noh ïa kine ki kam thombor pyrshah ïa ki Khristan ha kylleng ka ri ri India.
Kum ban shu pynkynmaw ka Sr. Preeti Mary bad ka Sr. Sister Vandana Francis, kiba dei na ka Jingïasyllok Assisi Sisters of Mary Immaculate ki trei ha ka Hospital ha Agra.
Ha ka 26 tarik, Naitung, katba ki dang synran ïa ki lai ngut ki samla kynthei na Narayanpur District, Chhattisgarh ban leit sha Agra ban trei kum ki nongshet ha ka Convent, ki arngut ki sister bad uwei u rangbah u Sukhman Mandavi, ki la shah pakhang lynti ha Chhattisgarh Railway Station ha ki dkhot ka Bajrang Dal.
Da kaba pdiang ïa ka jingujor jong ka Bajrang Dal, ki Pulit ki la ïalam noh ïa ki arngut ki Sister bad ïa u Sukhman Mandavi sha thanat halor ka jingkynnoh bad pharep lamler ba ki dei kiba donkti ban khaïi briew bad ban pynkylla niam jubor.