Shillong, Jylliew, 16: Ka video jong u Raja Raghuvanshi bad ka tnga jong u ka Sonam katba ki dang ïaid kjat sha ka shnong Nongriat, ka la saphriang ha ka rynsan Social Media. La ngeit ba kane ka dei ka Video kaba khatduh eh ban ïohi ïa u Raja Raghuvanshi ha shwa ba un shah pynïap ha la ka jong ka kurim bad ha ki paralok jong u samla jong ka u Raj Kushwaha.
Ha kane ka video u Travel Vlogger u la iohring ia ka dur jong ki lai ngut kiba donkti ban pyniap ia u Raja Raghuvanshi u Vishal Chauhan, u Anand Kurmi bad u Akash Rajput katba ki dang bud nadien ha ka por ba ki dang kiew ia u thiep ha ka shnong Nongriat.
Kane ka video ka dei kaba la ïoh ringdur da uwei u nongjngohkai pyrthei u Devender Singh ha ka por kumba 9:45 baje mynstep katba u dang ring video ïalade ha ka jingïaid lynti ban leit jngoh ïa ka jingkieng jri ha ka 23 tarik Jymmang, 2025 ha ka shnong Nongriat kaba don ha ka thaiñ Sohra.
U Devender Singh uba la thep ïa kane ka video ha ka Instagram u la kyntu ïa ki paidbah kiba pyndonkam ïa ka Social Media ba kin ïarap ban pynsaphriang ïa kane ka video khnang ban ïarap ïa ki Pulit ka Jylla Meghalaya ba kin nang lap ksai shuh shuh ha ka jingtohkit kaba dang ïaid mynta shakhmat.
“Nga la leit kai sha Meghalaya bad nga la leit jngoh ïa ka jingkieng jri ha ka 23tarik, Jymmang,” la thoh u Singh hapoh ka video ba la thep ha ka Instagram.
“Katba nga dang bishar ïa ki video jong nga hynnin ka sngi, nga la lap ïa kawei na ki video jong ki shi jur. Ka dei ha ka por kumba 9:45 baje mynstep, ngi dang dang sharum, bad ki dang kiew shaneng hadien ka jingsahmiet ha ka shnong Nongriat. Ka Sonam ka phong da kajuh ka sopti rong lieh ba la lap najan ka met jong u Raja. Haba nga peit mynta ïa u Raja ha kane ka video….nga pang ka mynsiem. U i long jaijai, khlem tip ïa kaei ka apot kaba la ap ïa u.”
Ha ka video, la ïohi ba ka Sonam ka la ïaid nakhmat bad rah ïa kawei ka pla plastik, ba la suba ka lah ban dei ka jaiñ jri kup slap, katba u Raja u dang bud nadien jong ka, u kit ïa ki tum ki tam jong ki. Ka video ba la saphriang ka la kynjoh palat 4.5 million ngut kiba peit bad da ki hajar ngut kiba pyndonkam (ïa ka Instagram) ki la pynpaw ïa ka jingsngew shon mynsiem bad ka jingsngewsih halor kane ka jingjia.
“Ki khmat jong ka ki phai sha ka Camera, khlem jingisheptieng, hynrei kum kaba la kheiñ jingkheiñ bha,” la pynpaw uwei u nongkynthoh
“I kumba ka la tip lypa ba kane ka video shisien ka sngi kan sa wan ban kthong ïa ka.”
Sa kawei pat ka jingkynthoh ka ong, “i kumba u Raja u shaniah. U bat ïa ki pla, u bud nadien ka kurim…….bad ka ïalam ïa u sha ka jingïap. Kaba itriem bha.”
Katkum ka jingïathuh jong ki Pulit ka Meghalaya, u Raja bad ka Sonam ki la mih na Shipra Homestay hapdeng ka por 5:30 baje bad 6:00 baje mynstep ha ka 23 tarik Jymmang. Hadien kane, ha kane kajuh ka sngi, u Raja u la shah pynïap bad ïa ka met jong u la bret sha ka riat kaba jrong kumba 1000 phut. Ïa ka met jong u la lap ha ka 2 tarik Jylliew hadien ka jingwad shitom jong ki kynhun bapher bapher.
Kine ki shikurim ki la ïathoh ha ka 11 tarik Jymmang ha Indore, bad ki la wan poi sha ka Meghalaya ha ka 21 tarik Jymmang ban leit kai honeymoon. La pyntip ba ki la jah rngai ha Sohra ha ka 23 tarik, Jymmang.
Ïa ka Sonam la kem hadien shitaiew na Ghazipur, Uttar Pradesh. Ha ka jingtohkit, ka la phla ba ka dei ma ka, kaba donkti ban pynïap ïa u Raja da kaba ïasylla lang bad u samla jong ka, u Raj Kushwaha. Ka la phla ruh ïa ka kyrteng jong kiba donkti, kata, u Vishal Chauhan, u Anand Kurmi bad u Akash Rajput.
Ka Sonam, u Raj Kushwaha, u Vishal Chauhan, u Anand Kurmi bad u Akash Rajput ki don mynta ha ka along ki Pulit ha Shillong. Ka kashari ka la aibor ïa ki Pulit 8 sngi ban pynlong ïa ka jingtohkit kaba bniah pyrshah ïa kine ki san ngut.
