Shillong, Lber, 19: Ka Khasi Students Union, Mawkyllut Unit ka dap da ka jingsngewkhia bad ka jingsngewsih halor ka jingleh bym suidniew bad ka jingsahdien ka jingmut jingpyrkhat ki paidbah ha kaba ïadei bad ka jingkhuid jingsuba.
Da kaba shim halade ïa ka jingkitkhlieh, ki dkhot jong ka KSU Mawkyllut Unit, ha ka sngi Baar ki la leit ban pynkhuid ïa ka Wah Mawpon kaba don hajan ka shnong Mawkyrwat na ka daw ka jingbret pathar jong ki briew ïa ki jakhlia khlem da suidniew shuh ïa ka jingkordor jong ka mei mariang.
Watla ka shnong ryngkat ka KSU ki ju maham na ka por sha ka por ïa kiba saitjaiñ ha kane ka Wah ba kim dei ban bret ïa ki jakhlia hynrei ki briew ki leh kum bym don skhor nalor ba kane ka wah ka dei tyllong umbam umdih ïa kiba bun ki shnong ha ka thaiñ Mawkyrwat.
