Shillong, Nailar, 26: Kawei ka jingjia ha ka Lah Sngi u Blei, kawei ka Gypsy kaba dang ïaid lynti la antad ba ka la shah siat kuli ba la suba ba ki lah ban dei na ki kynhun kieng atiar ha ka surok khappud hajan Maheskhola, ka shnong kaba hap hapoh ka Ranikor Civil Sun Division, South West Khasi Hills District kaba don marjan bad ka khappud bad ka ri Bangladesh.
U Superintendent of Police ka South West Khasi Hills District Bah B. Jyrwa u la ïathuh ba katkum ka jingïoh lum jingtip ba ka jingjia ka jia ha ka step jong ka Lah Sngi u Blei ha ka por kumba 9:30 baje mynstep.
La ïathuh ba halor kane ka jingjia la don arngut ki nongshong shnong na ka shnong Nongjri kiba shong hapoh ka kali Gupsy ha kaba ki la leit ban pyntip halor kane ha Nonghyllam Police Station.
“Katba ki dang ïaid lynti lyngba ka surok ba khamjan na Koraibari ban poi sha ka surok ha Maheskhola, kynsan kynsan la ïohsngew ka jingbthei kaba jam (ba syriem kum ka jingsiat suloi) na ka bynta jong ka khlaw bad kim shym la ïohi briew satia bad ki la phet marmar bad leit pyntip sha ki Pulit ka Nonghyllam Police Station”, la ong u SP.
Hadien kata, mar mar ki Pulit na Nonghyllam Police Station ryngkat bad ki Pulit ka Borsora Checkpost ki la leit khynra sha kane ka jaka hynrei kim shym la lap eiei, la ïathuh shuh shuh u SP.
Ki Pulit ki la pynlong ka jingtohkit kaba bniah halor kane.
