Shillong, Jylliew, 06: Ka Kong Bindas kaba la sdang ïa ka jingshah thngan ha ka por 12:00 baje mynsngi ha ka sngi Palei ka la ïathuh ba ka la sdang ban sngewthuh ïa ka jingtlot jong ka met ynda la poi ka por 9:00 baje mynmiet.
Ka la ïathuh ba kat haduh ka por 9:00 baje mynmiet ki doktor kim pat shym la wan leh satia ïa ka Medical Checkup ban peit ïa ka jinglong jingman jong ka koit ka khiah jong ka Kong Bindas Syiem.
“Ïa mynta hi kam pat don eiei kaba pynshitom bad kaba ktah ïa ka met jong nga, nga long hi kumne kumba nga long, ka don tang khyndiat ka jingtlot haba kam don ka bam (ha ka met) hynrei haduh mynta kam pat don ka jingshitom,” ka la ong.
“Haba nga wan shah thngan, nga khlem mut ban shu pynlong kum ka drama. Nga wan ban shah thngan da kaba khuid bad ngan shah thngan hi ruh shisha,” la bynrap ka Kong Bindas.
Ka la kyrpad ruh ïa ki paralok kiba leit ai mynsiem ïa ka ban ym rah jingbam ne bam jingbam hapoh ka dara ba ka shong shah thngan ha Parking Lot hajan ka ophis Addl. Secretariat, Shillong.
