Shillong, K’lyngkot, 27: Ka Khasi Students Union, Mawlai circle ha ka Lah Sngi u Blei ka la pynlong biang ïa ka lympung ïalehkai Maitshaphrang Khasi League Basketball Tournament ba la pynlong ha Basketball Court kaba don ha Mawlai Nongpdeng da ka jingïashim bynta ki 17 tylli ki kynhun ïalehkai shynrang bad kynthei“.
Ïa kane ka lympung ïalehkai la plie paidbah da u President jong ka Mawlai Town Dorbar u Bah Herlambok War uba la long kum u kongsan ryngkat ka jingïadon lang jong u Adviser ka KSU Mawlai Circle u samla Rapborlang Nongrum uba la long kum u kongsan bakyrpang, u President jong ka KSU Mawlai Circle u samla Biangbor Paliar bad ki dkhot jong ka KSU.
Ha ka jingïalehkai kaba sdang, ka kynhun ïalehkai jong ka Khliehshnong ka la pynliem noh ïa ka kynhun ïalehkai jong ka KSU Madanrting da 56 basket la 35 basket bad ïa ka nam Player of the Match la ïoh rah da u samla Ronan Hynñiewta na ka kynhun ïalehkai Khliehshnong.
