Shillong, Nailar 25: Ka 2nd Annual North East Zonal Conference of Press Information Bureau (PIB) bad Central Bureau of Communication (CBC) hapoh ka tnad Information and Broadcasting, Sorkar India, ka la sdang mynta ka sngi ha Shillong, Meghalaya.
Kane ka jingïalang ba ar sngi ka thmu ban kyntiew ïa ka bor treikam, wanrah ïa ka jingïatreilang kaba kham bha jong ki field unit, bad pynthikna ba ki buit ai jingtip ha ka thaiñ shateilammihngi ki long kiba kham seisoh shuh shuh, kiba ïaid da ka teknoloji, bad kiba ïahap bad ka jaka.
Ka jingïalang kaba ar sngi ka la sakhi ïa ka jingïashim bynta jong ki heh sorkar na baroh ki jylla jong ka thaiñ shateilammihngi, kynthup ïa ki Director, ki Ophisar Field Publicity, ki nongïarap ban pynbna paidbah, ki nongtrei Account bad bor pynïaid kam, kaba la pynlong ïa ka kum ka rynsan ha ka thaiñ ban ïasam jingmut bad ban kyntiew ïa ka bor treikam.
Ïa kane ka prokram la sdang da u Kripa Shankar Yadav, Additional Director General ka NE Zone, uba la batai ïa ka jingthmu ban pynlong ïa ka jingïalang ha ka thaiñ. U la ban jur ïa ka jingdonkam jong kum kine ki jingïalang ha ki thaiñ ban tei ïa ka bor treikam, ban pynbeit ïa ki rukom pynïaid kam, bad ban kyntiew ïa ka jingseisoh jong ki sienjam ban ai jingtip ha ka thaiñ shatei lammihngi.
Ha ka jingai jingkren jong ka, ka kongsan jong kane ka jingïalang, ka Kanchan Prasad, DG, CBC, ka la kdew ïa ka jingdonkam jong ka thaiñ shatei lammihngi ha ka kam ai jingtip jong ka ri baroh kawei. Ka la ong ba da ka jingmih jong ki lad pathai khubor digital, ka rukom ai jingtip ka Sorkar ka dei ban pynkylla stet khnang ban dang long kaba ïahap bad kaba lah ban shaniah. Ka la pynpaw ïa ka jingdonkam ban pyndonkam ïa ki jingdon jingem bad ka jingïatreilang kaba khlaiñ hapdeng ki jaka treikam ba kongsan, ki ophis ha ki thaiñ, bad ki tnat trei kam.
Ka la ban jur ruh ïa ka jingdonkam ban don ka jingpynkhreh prokram katkum ki jaka, ban pynthikna ba ki jingai jingtip kin ïahap bad ki jinglong jingman bad ki jingthmu ba kongsan jong ka thaiñ, ha ka jingïatreilang bad ki tnad sorkar kum ka DIPR, bad ban pynkhreh shuwa ïa ka por na ka bynta ka jingtreikam kaba seisoh tam. Da kaba ai khublei ïa ka jingaiti lut jong ki ophisar ha ka thaiñ, ka la pynthikna ba ka CBC Headquarter kan ai ïa ka jingkyrshan ban pynbeit ïa ki jingeh bad ruh ban kyntiew ïa ka bor treikam.
Kum shibynta jong ka technical session, ka Regional Office, Guwahati bad ka Regional Office, Imphal ki la ai la ki jong ki jong ki jingkren halor ki kam ba la pyndep haduh mynta bad ki jingthmu na ka bynta ka lawei. Ki jingïalang ki la kynthup ruh ïa ki jingïamir jingmut halor ki jingeh kiba ki ophis treikam ki ïakynduh bad ki lad ki lynti ban weng ïa kine ki jingeh.
Shuh shuh, u Harshit Narang, Deputy Director, CBC (HQ), u la ai ka jingkren halor ki lad ki lynti jong ki jingpynbna kiba lah ban ïoh hapoh ka CBC ha ka lad digital media. U la batai bniah kumno ka bureau ka nang pyndonkam ïa ki lad pathai khubor kum ka YouTube, Google Display Network, Facebook, Instagram, X, ki rynsan OTT, bad kiwei kiwei ki lad digital kiba dang mih ban ai jingtip ïa ki paidbah. U la ban jur ba ka jingpynbna digital ka ailad ban pynpoi thik pathik sha kiba dei ban poi bad ba ka plié lad ban sngewthuh ïa ka jingktah bad namar kane ka jingai jingtip jong ka Sorkar ka long kaba kham seisoh bad kaba kham ïahap bad ki samla.
Ha kane ka juh ka sngi, ki nongïashim bynta ki la ïakren ruh shaphang ka rukom pynïaid kam, ki jingkheiñ jingdiah, bad ki kam kiba dang sahteng na baroh ki unit ha ka NE Zone, la bud ïa kane da ka jinghikai treikam ha ka Website jong ka CBC na ka bynta ki kam ai jingtip, ha kaba la ai jingmut ïa ki nongïashim bynta kumno ban pyndonkam hok ïa ka rynsan na ka bynta ban pynkhreh ïa ki kam, ka jingai jingtip bad ka jingïadei bad ki briew. La pynkut ïa kane ka prokram da ka jingpyni ïa ka kolshor na ka kynhun tem jong ka Song & Drama Division.
Ha ka sngi kaba ar, ka prokram kan kynthup ïa ka jingpyni shaphang ki rukom treikam ba bha tam ha ka PIB NE Zone, bad yn bud ïa kane da ki jingai jingmut na ki tnad treikam na kylleng ka thaiñ. Yn pynlong ruh ïa ki jingïalang ha kaba ïadei bad ka jingpynïar ïa ka kam Social Media, ka jingkyntiew ïa ka jingpyndonkam ïa ka ktien Hindi, ki rukom treikam ba bha tam ha ka PFMS & Accounting, ka jinghikai halor ka GeM bad ka jingpynkhreh kam Swachhta.
