Shillong, Naiwieng, 11: Ka jingbishar ïa ka jingshah pynïap jong u nongkhaii na Indore u (L) Raja Raghuvanshi ka la sdang mynta ka sngi Baar ha Kashari Shillong, ha kaba la bishar bniah bha ïa u nongujor bad ïa u para jong uba la ïap, u Vipin Raghuvanshi.
Ki san ngut kiba la shah kynnoh, kynthup ïa ka tnga u Raja Raghuvanshi ka Sonam Raghuvanshi bad kiba ïasuhbuit lang bad ka – u Raj Kushwaha, u Vishal Singh Chauhan, u Aakash Singh Rajput bad u Anand Kurmi – ki la kyrpad ba kim shym la donkti ha ki jingshah kynnoh.
U Special Public Prosecutor KC Gautam u la batai ba ka jingpynngat kyndon (chargesheet) ka long kaba skhem bha kaba don kumba 90 ngut ki nongsakhi.
“Mynta ka sngi la khot tang ïa u Vipin Raghuvanshi. Kane ka jingbishar bniah kam pat dep, kan dang shimpor bha. Kiwei pat, kan sa poi sa ka pali jong ki, bad kin sa wan,” la ong u Gautam.
“Ka jingbishar ka la sdang da ka jingpynngat kyndon. Mynta ka sngi ka jingtohkit halor ki sakhi sabut ka la sdang. Ha ka jingpynngat kyndon ki don kumba 90 ngut ki nongsakhi. Ka jingpynngat, nga lah ban ong, ka dei ka skhem bha,” u la bynrap.
U Vipin Raghuvanshi, u nongujor, u la ong, “namar ba ka por ka la kut mynta ka sngi, la ai ïa nga ïa ka tarik kaba bud, kata ha ka 26 tarik, Naiwieng. Namar ka jingduna por, ym shym la lah ban buh jingthoh ïa ka jingkren kaba pura.”
Ka jingjia ka long ha kaba ïadei bad ka jingshah pynïap u Raja Raghuvanshi ha ka jingleit kai “honeymoon” sha Meghalaya ha u bnai Jymmang.
Ïa ka met jong u la lap na ka lyuh ba jylliew hajan ka Wei Sawdong Falls ha ka 2 tarik, Jylliew bad ki Pulit ka Sohra Police Station ki la aiti ai ka chargesheet kaba 790 sla.
U SP ka East Khasi Hills Bah Vivek Syiem dang shen u la pyntip ba ïa ka jingpynngat kyndon kaba ar ki Pulit ki ladep ban pynkhreh bad la khmihlynti ban aiti noh ha ka taiew balai mynta u bnai Naiwieng.
