Shillong, Naitung, 06: Sa lai ngut ki Nurse na ka jylla Meghalaya ki la shah jied ban leit trei sha ka ri Japan hadien ba ki la pyndep ïa ka jingshah hikai pyntbit ïa ka ktien Japanese lyngba ka Chief Minister Global Program.
U Myntri Rangbah ka Jylla u Conrad K Sangma u la pynbna ba kine ki lai ngut ki Nurse ki la poi sha ka ka ri Japan dang shen.
Lyngba ka CM Global Program, ïa ki Nurse yn sa bynta ban phah trei ha ki hospital bapher bapher bad ki Care Home kiba don ha ka ri Japan.
Haba pyntip ïa kane ha ka X, u Conrad u la ai khublei kyrpang ïa kine ki lai ngut ki Nurse.
“Nga sngewkmen ban pyntip ba sa lai ngut ki Nurse na ka jylla Meghalaya, ka Shishalapyntngen Lartang, ka Luanda B. Sangma bad ka Baniewkor Mukhim ki la poi sha Japan lyngba ka Chief Minister Global Program,” la pyntip u Myntri Rangbah.
Ka jingjied ïa ki Nurse ka long lyngba ka Overseas Nursing Job Fair kaba la long ha u snem baladep ha nongbah Shillong.
Lyngba kane ka Job Fair arphew hynñiew ngut ki Nurse na kane ka jylla ki la shah jied ban sdang ïa ka jingïaid lynti sha Japan hadien ba ki la pyndep ïa ka jingshah hikai pyntbit ban nang bad ban kren ïa ka ktien Japanese.
Kane ka jingplie lad jong ka Sorkar ïa ki samla ka long ban pynïoh ïa ki lad ïohkam ïohjam bad ban ïarap ba kin nang kham tbit shuh shuh ïa ka kam kaba ki la angnud ban trei.
Kum shi bynta jong ka “Skills Meghalaya” scheme, ka Sorkar Meghalaya ka la bei pisa ruh T. 50,000 hajar na ka bynta kawei ka Nurse lyngba ka Meghalaya State Skill Development Society (MSSDS). Kane ka jingai jingkyrshan ka long ban ïarap shuh shuh sa haduh 300 ngut ki Nurse ha ki snem ki ban sa wan.
Ïa ka jingai jinghikai la pynlong da ki 10 ngut ki nonghikai Japanese ha NAVIS. Wat hapdeng ki jingshah tynjuh kiba bun ban nang ïa ka ktien kaba thymmai, ki samla kiba angnud ban trei ïa ka kam Nurse ki la ïohmad ïa kawei pat ka jingim kaba thymmai sha kawei pat ka ri.
