Shillong, Naitung 29: Ka A·chik Holistic Awakening Movement (AHAM) ka la aiti ïa ka jingkyrpad sha u Deputy Commissioner bad Superintendent of Police ka South West Garo Hills, ha kaba ka la pynpaw ïa ka jingsngewkhia halor ka jingsdang ban bun ki briew kiba wansah beaiñ ha ki shnong kum ka Takuranbari bad Ishakuri.
Kane ka seng ka la kynnoh ba ki la don ki kynhun jaitbynriew kiba ym lah ban ithuh ki la ïaibteng ban kyntur pud sha ki jaka jong kine ki shnong, ha kaba la ïoh jingtip ba ïa kine la ai jingïarap da ki riew shimet kiba na ka shnong. Ki la kam ruh ba kine ki kynhun ki la ïoh ïa ki jaka bad ki la sah ruh beaiñ da kaba pyndonkam da ki kot ki sla kiba thok ba shukor bad ki ration card ban ïoh ïa ki EPIC ha kaba kane ka la nang kyntiew ïa ka jingbun paid jong manla ka san snem na ka daw jong kane ka jingwan sah ki poiwir beaiñ.
Wat hapdeng ka jingïajurip lang kaba la leh ha ka 21 tarik u Rymphang, 2023 haba khmih ïa ka jingujor kaba rim, la kynnoh ba kam shym la don ka jingshim kam.
Na ka liang ka AHAM ka la pynpaw ruh kumjuh ïa ka jingsngewkhia halor ka jingpyntrei ka sorkar Assam ïa ka Jal Jeevan Mission (JJM) bad PMAY ha kine ki thaiñ, kiba dang hab hapoh u pud u sam jong ka jylla Meghalaya, ha kaba la kynnoh ba kane ka dei ka jingkyntur pud kaba la don ka jingpynshlur.
Halor kane ka AHAM ka dawa jur ba dei ban don ka jingleit jurip ha manla ki thliew ïing ban pynshisha biang ïa ki EPIC ha kine ki thaiñ, ban bishar biang ïa ki kot ki sla ba la aiti ha kine ki 10 snem ba la leit.
Da kaba bynrap shuh shuh, ka AHAM ka la pynpaw ruh ba ka shnong Mirjumala, kaba dei ka thaiñ kaba khappud bad ka Assam ka dei ka jaka rung jaka mih kaba tlot tam na ka bytnta ban leh ïa ki kam kum ka kam lute, ka kam khaïi drok bad ka jingwan rung ki poiwir kiba khlem da la ai kyrteng ne buh jingthoh ha ki kot ki sla.
Kane ka seng ka la maham ba ha kane ka por ba dang jur bha ka jingkyndang ïa ki briew kiba sah beaiñ ha Assam, bun na ki, mynta ki la pyrshang ban kynriah sha Takuranbari bad Ishakuri, ha kaba kane ka buh jingma ïa ki nongshong shnong riewlum.
