Shillong, K’lyngkot, 11: Ka National People’s Party (NPP) ha ka sngi Saitjaiñ ka la pyllait paidbah ïa ka thup kyrteng baar jong ki hynñiew ngut ki kyrtong ki ban ïakhun ha ka elekshon jong ki Autonomous District Council (ADC), ka ban sa long ha ka 21 tarik, Rymphang, 2025.
Ki kyrtong kiba la paw kyrteng ki long u MLA ka Jirang Constituency u Bah Sosthenes Sohtun na Jirang bad u MLA barim u Bah Samlin Malngiang u ban ïakhun na Sohïong.
Kiwei pat ki kyrtong ki long ka Dr Amanda Annete Pakynteiñ na Mawkynrew, Bah Joplin Sten na Mawhati, u Bah Sharailang Warjri na Mawthadraishan bad u Bah Kordor L. Nongkynrih na Mawkhar Pynthorumkhrah.
Ka NPP ka la sei bujli da u Bah Elias Kharbihkhiew na Sohryngkham Constituency hadien u Chief Executive Member (CEM) ka KHADC u Bah Pynïaid Sing Syiem uba la mihkhmat kum u MDC ka Sohryngkham Constituency la lai samoi kynthih u la rai ban ïakhun noh na Nongthymmai Constituency ha kane ka kynti.
Haduh mynta, ka NPP ka la pynbna 45 ngut ki kyrtong, 25 ha KHADC bad 20 ngut ha JHADC.
