Shillong, Jylliew, 28: Kan long ka khubor kaba pynsngewtynnat haduh katta katta ïa ki riewieid phutbol ka jylla Meghalaya bad khamtam ïa ka Ryntih sports Social and Cultural Club ka dorbar shnong Iewshyllong, kaba hap hapoh ka Elaka Laitlyngkot, East Khasi Hills District kaba la lah ban sei ïa ki arngut ki rangïalehkai phutbol kiba kynsai.
Kine ki arngut ki rangïalehkai phutbol ki dei kiba la tip kyrteng kum u Ronney Wilson Kharbudon, uba la 22 snem ka rta uba lehkai na ka Goa Football Club bad u Ricky John Shabong uba la 22 snem ka rta uba ïalehkai na ka Punjab Football Club. Kine ki arngut kin ïohlad ban mih madan ha ka lympung ïalehkai jong ka Indian Super League 2025-2026 ha kane ka samoi ïalehkai ka ban sa long.
U Ricky John Shabong u dei ruh u rangïalehkai uba la ïoh ban mihkhmat ïa ka ri India kaba la poi sha ka Quarter Final jong ka lympung ïalehkai U-16 ha ka AFC Cup Championship kaba la long ha ka ri Malaysia ha u snem 2018 katba u Ronney u dei u rangïalehkai jong ka Shillong Lajong Football Club shwa ba un leit pynïasoh ïalade bad ka Goa Football Club.
Ïa kine ki arngut ki khun samla, ka Ryntih sports Social and Cultural Club bad ka dorbar shnong Iewshyllong ha ka 27 tarik Jylliew, 2025 ki la pynkup burom ïa kine ki samla kum ka jingkitbok kitrwiang ha kaba la sakhi lang da u MLA ka Sohra u Bah Gavin M. Mylliem uba la long kum u kongsan, u CEM ka KHADC u Bah Shemborlang Rynjah, u Sirdar jong ka Elaka Laitlyngkot u Bah Allenson Shabong, u Bah Ryngkatlang Lyndem, Rangbah Shnong Dong Iewshyllong, ki nongkitkam ka Ryntih Sports Social & Cultural Club bad kiwei kiwei.
