Shillong, Naitung, 07: Da ki hajar ngut ki paidbah ki la mih ban ïashim bynta ha ka Peace rally bad ban pynrem jur ïa ka jingshah pynïap ka samla Phyrnailin Kharsyntiew, 27 snem ka rta ha u samla uba ka la pan ïakhlad u samla Roberto Marngar, 25 snem kaba la jia ha ka 30 tarik, Jylliew 2025 ha Pyndengumiong Mairang.
Ka samla Phyrnailin Kharsyntiew ka dei kaba shong basah ha ka shnong Mawkhapkhwa, ka shnong kaba hap hapoh ha Wahrit Dorbar Pyllun, Eastern West Khasi Hills District.
Kum ban shu pynkynmaw, ïa u samla Roberto Marngar la kem da ki riewpaidbah kiba la aiti sha ki Pulit jong ka Mairang Police Station.
Ha ka peace rally ba la pynlong da ka Dorbar Shnong Wahrit Pyllun kaba kynthup ïa ki 7 tylli ki shnong ki paidbah ki la pyrta jam ka sur pynrem kaba ong, ‘ngi dawai ïa ka hok, shi jingim ha patok.
La sakhi ruh ba bun ki kali kiba ïaid ba ieng ha kane ka sngi ki la teh da ki lama iong kum ka dak ban pynpaw ïa ka jingpynrem halor ka jingshahpynïap ka samla Phyrnailin Kharsyntiew.
Ki nongkren ha ka jingïalang kaba la long hadien ka jingïaid peace rally ki la pynrem jur ïa u nongleh kam bymman bad dawa ïa ki bor jong ka aiñ ban pynshitom da kaba tyngeh katkum ki kyndon aiñ jong ka ri.
Nalor ki paidbah, la ïashim bynta lang ha ka jingïaid rally da ki nongïalam shnong, ki khynnah skul bad kynthup ruh u Executive Member jong ka Khasi Hills Autonomous District Council (KHADC) u Bah Powell Sohkhlet uba long ruh u MDC jong ka Mawthadraishan Constituency.
