Shillong, Nailar, 27: Ki nongpang kiba leit shah sumar ha AYUSH Hospital, Bhoirymbong, Ribhoi District ki la hap ban kit lang ïa ki niut ki jaboh ki jabaiñ ynda ki leit phai sha la iing namarba ka Hospital kam pat don satia ïa ka jaka bret nuit haduh mynta.
Halor kane ka jingjia, ka Hynñiewtrep Integrated Territorial Organisation (HITO) Bhoirrymbong Circle ka la phah da ka jingthoh sha ka Myntri ka Sorkar Jylla kaba khmih ïa ka tnat ka Koit ka Khiah ka Dr. Ampareen Lyngdoh ba kan shimkhia halor ka jingbym pat don jaka thehniut ha ka hospital.
“Kane ka shlem ai jingsumar ka long ka jingkyrkhu ïa ka thaiñ, hynrei ngi la ïoh pat ïa ki jingud jong ki nongpang ba ka hospital naduh ba la plie haduh mynta kam pat don ïa ka jaka theh niut,” la ong ka seng ha u kyrwoh ba la phah sha ki lad pathai khubor.
“La ong ba ka jingbym don ïa ka jaka theh niut, ki nongtrei ka hospital ki hap ban phah kit sha la iing, sha ki shnong ïa ki nongpang ïa ki niut bad kane ka buh jingma namarba na kine jaboh ka lah ban pynsaphraing ïa ki jingpang ba laiphewjait,” la ong ka seng.
“Ngim lah ban pdiang bad ngi dawa ïa ki bor sorkar ba kin shna noh mardor ïa ka jaka theh nuit hapoh ki sawdong sawkun jong ka hospital,” la pynpaw ka seng.
