Shillong, Naitung, 14: Katto katne taiew hadien ba la wan phai sha la iing na ka jingjop ha ka jingleit kiew ïa u lum Everest dang shen, u lum uba jrong tam ha ka pyrthei, ka samla Rifiness Warjri, ka khun kynthei jong u Bah Shlurbor Kharmyndai, ha ka Lah Sngi u Blei ka la leit ai khublei bad ban pynpaw ka jingsngew nguh ïa ki kmie kha jong ka kiba dei na ka kur Kharmyndai shnong Laitlarem, Nongspung, Nongspung Syiemship.
Ha ka jingpdiang burom ïa ka samla Rifiness Warjri, la sakhi lang da u Sordar jong ka shnong Nongspung Pyllun u Bah John Worthborn Kharmyndai, u Rangbah Shnong jong ka shnong Laitlarem u Bah Tobias Mawlong bad ki dkhot ka Seng Kynthei jong ka shnong Laitlarem.
Nalor ka kyrkhu kyrdoh, ki nia kha ki la kyrkhu kyrdoh ïa ka samla Rifiness ba kan nang lah ban pynurlong shuh shuh ïa ki jingthmu kiba don ha ka jingim jong ka.
Ka samla Rifiness ka la ïathuh khana ruh khyndiat kumno ka la poi sha ka jingleit kiew ïa u lum Everest bad kiei ki jingeh ba ka la ïakynduh ha ka jingïaid lynti jong ka haduh ba kan da poi tiap ha kliar jong u lum Everest.
“Ha ka jingleit kiew ïa u lum naduh kaba sdang ka la don ka jingartatien ïoh ba ngam lah ban pyndep ïa ka jingthmu. Hynrei ngam shym la ailad, kumta nga la pyndem ïalade ha ki jingduwai. Dei lyngba ka jingduwai ha u Blei ba nga la lah ban poi haduh ka kliar jong u lum Everest,” la ong ka samla Rifiness.
