Shillong, Naitung 27: Ka Garoland State Movement Committee (GSMC) ka la khot ka jingïalang paidbah ha Tura ban pyrkhat ïa ki kam jong ka seng kiba ïadei bad ka saiñ hima sima, ka riti synshar paidbah ka ri bad ki jingeh ba mad halor ka kolshor kaba mynta ba la mad ha ka thaiñ Garo.
Ha kane ka jingïalang, ka ïing ka la rai da kawei ka sur ban pynskhem ïa artylli ki rai, kawei ka dei ka jingïaid bad jingïalang paidbah kaba jai jai bad ka jingaiti ïa ka dorkhas sha New Delhi ha u Naiwieng bad ka jingïalang paidbah bad ka peace rally ka ban long ha ka 27 tarik u Nailur ha Tura.
Ka GSMC ka la shim ka rai ban pynïaid shakhmat ïa kine ki prokram ha ka ri kiba dei ruh ki jingïakhih katkum ka synshar paidbah ha ka dur jong ka peace rally bad ka dorkhas ka ban aiti sha New Delhi ha u Naiwieng.
Ka jingthmu ba kongsan jong kane ka jingsdang ka long ban pynpaw paidbah ïa ka jingdawa kaba la slem ban thaw noh ïa ka Garoland, ka ban dei ka jylla la jong kaba hab hapoh ka Article 3 jong ka riti synshar ka ri India, ban pynthikna ïa ka jingbishar hok, ka jingithuh, bad ka rukom synshar kaba ïaryngkat lang na ka bynta ki trai ri trai muluk ki paid Garo. Ïa kane ka dorkhas la ong ba kadei ka jingaiti biang sa shisien sha ka President ka ri India bad sha ka tnat ki Kam Pohïing ka sorkar pdeng.
Ha ka jingïalang la shim ka rai kaba mynjur ban ïada ïa ka GHADC kum kaba kongsan ban ïada ïa ki paidbah ka Garo. La ong ba ka council kam dei tang ka met synshar paidbah, hynrei ka dei ka jingpynwandur jong ka jingsynshar dalade ïalade ki paid Garo, lyngba ka jingdon ki rukom treikam ha ki shnong bad ka jingkynmaw kaba lumlang da baroh,” ong ka kyrwoh ba la phah da ka GSMC.
Ka la ïathuh ruh ba kumba ka long mynta ka GHADC ka don hapdeng ka jingkyrduh pisa kaba jur bha ha kane ka khyllipmat, ha kaba ki nongtrei ki khlem ïoh tulop mynta la bun bnai, lada ym dei da ki snem.
