Sha ka Sorkar Pdeng yn rah ka BJP ïa ki jingeh jong ki jaidbynriew OBC ba sah ha Meghalaya

Shillong, Nailar, 13: Ka Bharatiya Janata Party (BJP) Meghalaya State Unit ka la pynthikna ban shimkhia bad ka Sorkar Sylla bad ka Sorkar Pdeng ha kaba ïadei bad ki mat jong ki jaitbynriew kiba dang sahdien jong ka jylla.

Ïa kane ka rai la shim ha ka jingïalang ba nyngkong jong ka OBC Morcha ka BJP ha kaba la donlang u President ka jylla u Rikman G Momen, u Vice President ka jylla u Bipen Pradhan bad u General Secretary ka jylla u Bah Wankitbok Pohshna.

Haba kren ha ka jingïalang u General Secretary ka jylla u Bah Wankitbok Pohshna u la pynpaw ba ka BJP ka Jylla ka long kaba la pynkhreh ban rah ïa ki katto katne ki mat jong ki jaidbynriew ba dang sahdien da kaba ïatreilang bad ka Sorkar Jylla bad ka Sorkar Pdeng.

U Bah Pohshna u la pynkynmaw ïa baroh ba ka Sorkar kam pat buh ïa ka thup ïa ki jaidbynriew OBC kiba sah ha ka jylla Meghalaya ha kaba kim kim lah ban ïoh ïa ka bhah kyrpang kaba 27% ha baroh ki kam jong ka Sorkar Pdeng bad ki jaka pule.

U la ong ruh ba ka kynhun ki nongïalam ka BJP shen kin sa ïakynduh ïa u Myntri Rangbah ka Jylla bad ban ïakren ïa ki jingeh jong ki jaidbynriew ba dang sahdien bad ki jingeh kiba ki ïakynduh man ka por.

U la pyntip sha kiba don lang ha ka jingïalang, ba u la ïakynduh hi dalade ïa ki katto katne ki nongïalam OBC bad ki la pynpaw shai ba ka jaitbynriew kam sngewtynnad ban ïoh bynta lang ha ka bhah mang kyrpang hynrei ka kwah tang ban aplai ïa ki kam bapher bapher ha ki tnat treikam jong ka Sorkar Pdeng namarba haduh mynta ki dang shah pynduh ïa ka hok namarba ka Sorkar Meghalaya shym la phah ïa ka thup jong ki OBC ban ïoh jingithuh na ka Sorkar Pdeng.

Ka BJP ka la pynkhreh ruh ban ïakynduh ïa kiba bun ki kynhun khnang ban pynthikna ba ïa kane ka kam yn ïa pynbeit da ka jingïasngewthuh jingmut.