Shillong, Nailar, 25: U MP ka Congress na Tura u Saleng A Sangma u la phah ïa ka jingtyrwa sha ka Sorkar Pdeng ban pynïasoh ïa ka lynti rel na Mendipathar sha ki nongbah kiba heh sha rithor kum ka Kanyakumari, Mumbai, New Delhi bad Kolkata.
U Sangma u la kyntu ruh ïa ka Sorkar ban wanrah ruh ïa ka Rel kit mar ha rilum Garo da kaba pynpaw ba ka thaiñ ka la nang kiew bha ha ka jingdon jong ki karkhana bad ka jinglah ban pynmih ïa ki mar ba lah ban shalan shabar ka jylla.
“Nga la kyntu ïa ka Sorkar Pdeng ba kan pdiang ban pynïasoh Rel kaba kham stet kaba pynïasoh na Mendipathar sha Kanyakumari, sha Mumbai, sha New Delhi bad Kolkata. Hadien ba nga la peit ïa ka jinglong jingman ha rilum Garo, nga la pan ïa ka Rel kit mar ïa kaba u Myntri Rangbahduh ka ri bad u Myntri ba dei peit ki la mynjur ba kin sa khmih bniah ïa kane ka kam. Katba ngim pat ïoh ïa ka Rel kit mar na Mendipathar, Garo Hills kan ym pynmyntoi eiei ruh em,” ong u MP ha ka jingïakren bad ki lad pathai khubor ha ka Lah Sngi u Blei.
U Sangma u la pynpaw ïa ka jingmyntoi ha ka ïoh ka kot kaba lah ban mih na ka jingpynïasoh ïa ka lynti Rel, kynthup ïa ka jingshalan ïa ki mar rep na rilum Garo Hills sha kiwei pat ki bynta jong ka ri. U la pynpaw ba ïa ki mar rep jong ka thaiñ lah ban pynïaid iew bad die ha ki nongbah kiba heh, kaba kyntiew ïa ka ïoh ka kot jong ka thaiñ.
Katkum ka jingong jong u, ka steshon Rel Mendipathar mynta ka treikam tang hapdeng ka Mendipathar bad Guwahati, khlem da don satia ki rel kit mar.
U MP u la pynpaw ïa ka jingsngewkhia halor ka jingbymshngaiñ bad ka jingwan rung jong ki briew kiba nabar lada pynïar ïa ka lynti Rel sha kiwei pat ki bynta jong ka Garo Hills. U la pynskhem ïa ka jingdonkam ban don ki jaka talasi kiba biang ban pynthikna ïa ka jingshngaiñ jong ki nongshong shnong.
“Ha ka jingshisha haba phi kren shaphang ka jingwan rung kyrthep ki briew kiba nabar, ka Rel ka rung tang 14 kilomita haduh Mendipathar na ki khappud jong ka Assam bad haduh mynta ym pat da don eh ka jingwan rung kiba nabar hynrei lada ngi pynïar ïa ka lynti rel ngin hap ban peit ruh wat ïa ka jaka ban buh ïa ka jingtalasi,” ong u Sangma da kaba bynrap, “dei na kata ka daw ba ngam pan ban pynïar ïa ka lynti Rel haduh Jengjal ne sha kiwei kiwei ki bynta jong ka rilum Garo hynrei ka jingkwah jong nga ka long ban pynheh ïa ka Steshon Rel ha Mendipathar bad ka jingpynïasoh ïa ka lynti Rel na Mendipathar sha kiwei kiwei ki bynta jong ka ri India.”
“Ngim don ïa ki jaka talasi kiba biang. Ngam tharai ba kan long kaba dei ba ngan pan ïa kata lymda ka Sorkar ka ïoh ïa kiwei pat ki daw ba ka donkam ban pynïar ïa ka jingpynïasoh da ka lynti rel,” u la bynrap shuh shuh.
