Shillong, Naitung, 29: Ki nongïalam jong ka National Federation of New States (NFNS) kaba long ka shatri jong ki saw tylli ki kynhun kiba dawa ïa ki jylla ba thymmai ha ka thaiñ Shatei Lammihngi ha ka jingïakynduh lang ha ka sngi Baar ha nongbah Shillong ki la shim ïa ka rai ban leit pynsngew sha ka Sorkar Pdeng halor ka jingdawa jylla ba thymmai.
Ki saw tylli ki kynhun ki kynthup ïa ka Hills State Peoples Democratic Party (HSPDP) na rilum Khasi, ka Garoland State Movement Committee na rilum Garo jong ka Jylla Meghalaya, ka Joint Action Committee for Autonomous State na Karbi Anglong, ka Jylla Assam bad ka Indigenous Peoples Front of Tripura (IPFT) na ka Tripura.
U President jong ka HSPDP u Bah KP Pangniang ha ka jingïakren bad ki lad pathai khubor hadien ba la wai ka jingïalang u la ong, ‘kum ki dkhot jong ka National Federation of New States (NFNS) ngi la rai ban pynkhlaiñ ïa ka jingieng jong ngi, ïa ka jingïatreilang jong ngi, ka jingdawa jong ngi na ka bynta la ki jong ki jong ki jylla na ka bynta ban pynneh pynsah ïa la ka jinglong tynrai jong ki jaitbynriew riewlum bapher bapher hapoh ka thaiñ Shatei Lammihngi bad kumjuh ruh ban pynneh ïa ka snap paka bad ïa ka ktien ka thylliej.”
“Ngi sngewthuh ba ngim lah ban ieng tang ha la ki jong ki kynhun na kata ka daw ngi la hap ban thaw ïa ka shatri jong ka National Federation of New States (NFNS) ha kaba ïa baroh ki jingdawa jong ngi, ngin kyrshan lang iwei ïa iwei,” u la ong.
“Mynta ka sngi ngi la shim ruh kawei ka rai ban leit ïakynduh ïa u Myntri ka tnat Kam Pohing ka Sorkar India u Amit Shah ban aiti ïa ki dorkhas bad ngi la pyrkhat ba la kumno kumno ngin sa leit pyntip ha ka 24 tarik ne 25 tarik, Nailar, 2025 shaneng. Ngi la aiti ha u Co-Chairman u Nickman Ch. Marak bad ha u Secretary u Stalin Ingty ba kin leit pynbeit ïa ka sngi ban ïakynduh ïa u Myntri ka tnat Kam Pohing,” la ong u Bah Pangniang.
“Ha u bnai Nohprah, 2025 hapoh ka shatri jong ka ka National Federation of New States (NFNS) ngin sa pynlong ïa ka jingïashong kyllaiñ myngngor ha Jantar Mantar, New Delhi kumba ngi la sdang ha u snem 2022, 2023 ter ter. Ngin sa aiti ïa ki dorkhas bad ngin sa pynsngew ruh la ki jong ki mat jingdawa ryngkat ban pyntip sha ka Sorkar India ba ngi don ïa kine ki kynhun kiba dawa ïa la ki jong ki jylla ba thymmai,” la bynrap shuh shuh u Bah Pangniang.
