Shillong, Jylliew, 17: Ka Hynniewtrep Youths’ Council Seng Kmie ha ka Lah Sngi u Blei ka la phah biang sa hynriew ngut ki samla kiba la im kyrni ha ka jingdih drok ban ioh jingsumar ha ka ALIVE AGAIN FOUNDATION, ka Rehabilitation Centre kaba don ha ka jylla Assam.
U Vice President jong ka HYC Bah Donboklang Kharlyngdoh u la iathuh ba u don ruh uwei na ki samla ba la im kyrni ban dih drok ba la wan aiti da ka Seng Samla Mawryngkneng ban phah sumar ha kane ka ka Rehabilitation Centre kaba don ha ka jylla Assam. Nalor une uwei, ki don pat sa san ngut kiba na kane ka nongbah Shillong kiba ka seng ka la phah sumar ha ka ALIVE AGAIN FOUNDATION.
U la iathuh ba ka seng naduh ka sngi ba ka la pynbna ban iakhun pyrshah ia u drok, ki dkhot jong ka seng kim shym la shongthait hynrei ki la leit sha kylleng ki jaka ym tang ban khynra ne thang ia u drok hadien ba la kurup na ki nongdih drok hynrei ka seng ka la sneng la kraw bad la phah ruh ia kine ki samla sha ki Rehabilitation Centre hadien ba la ai jingmynjur na ki bahaiing hasem jong kine ki samla.
