Shillong, Jylliew, 26: Ki Pulit jong ka kynhun Special Investigation Team (SIT) ha ka sngi Palei ki la wan ïalam sha nongbah Shillong ïa ki lai ngut ki briew kiba donkti ba la kynnoh ba dei kiba ïadonkti ban pynjot ïa ki sakhi satar ha kaba ïadei bad ka jingshah pynïap jong u nongjngohkai pyrthei na Indore u Raja Raghuvanshi ha Sohra.
Kine ki lai ngut ki kynthup ïa u Silome James, uba dei u trai jong ka ïing ba la ai wai ïa ka ïing sha u Vishal Singh Chauhan bad arngut kiwei pat kiba la tip kyrteng kum u Balia Ahirwar, uba trei kum u security guard bad u Lokendra Singh Tomar, uba sah ha Gwalior, Madhya Pradesh bad uba dei u trai ïing jong ka ïingmala ha Dewas Naka ba la riehtngen da ka Sonam Raghuvanshi, kaba dei ka nongshah kynnoh ba hakhmat eh ha ka kam pynïap briew.
Tang shu poi ha Shillong, ki Pulit ki la rah beit beit ïa kine ki lai ngut sha Sadar Police Station shwa ban rah ïa ki sha Kashari khnang ban pan bor na ka bynta ban ïoh pynlong ïa ka jingtohkit kaba bniah pyrshah ïa ki.
Ha ka sngi Balang, u Superintendent of Police ka East Khasi Hills Bah Vivek Syiem u la pyntip ba ka Special Investigation Team (SIT) ka la ïoh kurup ïa kawei ka pistol shna hi, ar tylli ki magazine bad ar tylli ki kuli .32 na wah.
U SP u la pyntip ba ka kynhun SIT ka la ïoh kurup ïa kine ki tiar da jingïalam jong u Silome James, uba la shah kem halor ka jingpynjulor ïa ki sakhi sabut ha kaba ïadei bad ka jingshah pynïap u Raja Raghuvanshi.
U la ïathuh ba ka SIT ka la ïoh kurup ruh ïa ka pisa T.50 hajar na ka kali i10 jong u Silome James kaba don ïa u nombar MP09WG 2352. Ïa ka pisa la lap ha ka pla thep laptop jong u Raj, ïa kaba ladep thang ingkhong.
Ïa ka laptop, la ïathuh, ba la bret sha rud surok ha kaba ym shym la lap satia, la bynrap u SP.
