Shillong, Risaw, 17: Ka Ïingbishar Meghalaya High Court ka la pynsangeh ban bishar ïa ka mukotduma kaba ïadei bad ka jingthmu ban pynkynriah ïa ki 342 tylli ki longïing na Harijan Colony, Them Ïew Mawlong haduh u bnai ban wan (Naiwieng) kaba ailad ïa ka Sorkar Jylla bad ïa ka Harijan Panchayat Committee (HPC) ban ïa pynbeit lyngba ka jingïakren.
Ïa kane ka hukum la pynmih da ka Division Bench kaba kynthup ïa u Chief Justice Soumen Sen bad u Justice W. Diengdoh ha ka sngi Thohdieng, hadien ba la pyntip ba ki arliang mamla ki la sdang ïa ka jingïakren bad ïa ka jingïakajia yn sa lah ban ïapynbeit
“Halor kine ki jingkdew haneng, ïa kane ka kam yn buh pynkynriah haduh ka 17 tarik, Naiwieng, 2025. Ngi kyrmen bad shaniah ba hapoh katei ka por ba la kdew haneng, ka jingmut kaba bha kan jop bad ki ar liang kin pyrshang ban ïapynbeit ïa ki jingïakynad da kaba suk,” la ong ka ïingbishar.
Kum ban shu pynkynmaw, u Symbud Myntri Rangbah uba khmih ïa ka tnad Pynroi Sor u Bah Sniawbhalang Dhar u la pyntip ha ka 10 tarik, Risaw, ba ka Sorkar Jylla ka la ithuh katto katne ki jaka na ka bynta ka jingthmu ban pynkynriah ïa ka jaka sah jong ki Harijan.
“Ki jingïakren ki dang ïaid shwa ban shim rai halor ka jingjied ïa ka jaka thymmai. Ngi don ha ka kam, bad phin sa tip ynda ngi la rai,” u Bah Dhar u la ong.
Ha kaba ïadei bad ka jingïakren kaba dang ïaid shakhmat bad ka Ministry of Defence, u Bah Dhar u la ong, “ngi dang ïa kren bad ki.”
U la pynpaw ruh ïa ka jingkyrmen ba ïa kane ka mat yn sa ïapynbeit da ka jingïasngewthuh jingmut, watla ka jingbishar ka dang don ha ka miej jong ka ïingbishar.
