Shillong, Naiwieng, 10: U Myntri Rangbah ka Jylla u Conrad K. Sangma ha ka sngi u Blei u la pyntip sha u Myntri ka Sorkar India uba khmih ïa ka Ministry of Education u Dharmendra Pradhan ïa ka jinglong jingman hapoh ka skulbah North Eastern Hill University (NEHU) bad kyntu ruh ba un tuklar bad ban wad ïa ki lad ki lynti halor ki jingjia hapoh ka skulbah.
“Nga la pyntip sha u Myntri ka tnat Pule Puthi u Dharmendra Pradhan halor ka jingjia ha skulbah NEHU bad kyntu ba un wad ïa ki lad ki lynti halor kane ka mat,” ong u Sangma ha ka jingthoh ba la pynmih ha ka rynsan X.
Kane ka long hadien ba la ïoh jingtip ba u Vice-Chancellor jong ka skulbah NEHU u Prof. PS Shukla u la “jah rngai” ha kaba ki bor synshar jong ka East Khasi Hills District ki la pynthikna ïa ka jingbym don shuh jong u Prof. Shukla ha ingsah ha khmat ki spah ngut ki samla pule kiba pynlong ïa ka jingïakhih kiba ïalum shabar ka ingsah jong u Vice Chancellor ha ka sngi u Blei.
Ki samla pule ki la dawa ba dei ban ujor halor ka jingjah jong u Vice-Chancellor. Kane ka jingjia ka long hadien san ngut ba ki samla pule ka skulbah NEHU ki la pynlong ïa ka jingshah thngan ba khlem pud sngi hakhmat ka ophis treikam jong u Vice Chancellor ha kaba ki samla pule ki la dawa ba dei ban weng kam ïa u Registrar u Omkar Singh bad ïa u Deputy Registrar (Academics) u Amit Gupta bad ïa kiwei kiwei ki nonghikai bad ki nongtrei ba shu thungkam be-aiñ bad ban thung noh mardor ïa ki Pro Vice Chancellor ha Shillong bad ha Tura Campus.
Kum ban shu pynkynmaw hangne, ki nonghikai kiba don hapoh ka shatri jong ka NEHU Teacher’s Association ki la ïakynduh dang shen ïa u Lat ka Jylla u C.H Vijayashankar, uba long ruh u Chief Rector jong ka skulbah NEHU da kaba kyrpad ba un leh eiei halor kine ki jingjia hapoh ka skulbah.
Ka jingïakhih ba la khot pynlong da ka NEHUSU bad ba la kyrshan da ka KSU NEHU Unit ka la pyndkoh ruh ïa treikam treijam bad ka pule ka puthi hapoh ka skulbah NEHU bad ïa kane ka skulbah la khang dam ruh da ki samla pule.
Dang shen ki samla pule ki la thang ïa ki dur tyngshop jong u Vice Chancellor, u Registrar bad u Deputy Registrar.
Shwa ba u Prof. Shukla un jah rngai, la ar sien kynthih u la kyrpad ïa ki samla pule ba kin pynkut noh ïa ka jingïakhih da kaba wan sha ka miej jingïakren.
Ha ka jingkyrpad ïa ki samla pule ban wan sha ka miej jingïakren u Vice Chancellor u la ong, “khlem ka jingïakren, ki kti jong nga ki shah teh.”
