Shillong, Naiwieng, 25: Ka Sorkar Jylla ka la tyrwa ban phah sumar noh sha ki hospital kiba kham bha shabar ka jylla ïa ki arngut ki samla pule jong ka skulbah NEHU kiba la mynsaw jur ha ka jingjia aksiden hapoh ka jaka pule ha ka 17 tarik mynta u bnai, da kaba pynthikna ba kan ym don kano kano ka jingkhanglad ha ka jinglut jingsep.
Haba ïakren bad ki lad pathai khubor ha ka sngi Baar, u Symbud Myntri Rangbah Bah Sniawbhalang Dhar u la ai ïa ka jingtip kaba thymmai halor ka jinglong jingman jong ki arngut ki samla pule da kaba ong, iwei i la kham ïohbor katba iwei pat i dang donkam ban dang don hapdeng ka jingshah sumar ha hospital.
“Kyrmen ba kin ïoh noh ïa ka jingkoit jingkhiah,” u la ong.
“Hynrei, Sa sorkar ka la pynsngew ba lada ki jaka sumar ha Shillong kim biang, pynkynriah noh ïa ki shabar na ka bynta ka jingsumar kaba kham bha,” la bynrap biang u Bah Dhar, da kaba pynksan ïa ka jingkyrshan hapdeng ka jingsumar kaba dang ïaid shakhmat ha Nazareth Hospital.
Ka samla Daritngen Pohdukhei bad ka samla Stephanie Shadap ki la mynsaw jur bad ki la shah sumar ha ICU ha Nazareth Hospital hadien ba ki la shah tynrah ha kawei ka kali kaba la ñiah da u nongap pahara ka NEIGRIHMS u Parmen M. Sangma ha ka 17 tarik, Naiwieng.
Ki Pulit ki la kem ïa u Sangma bad ki la pynngat ïa u ha ki kyndon kiba ïadei bad ka jingthmu pynïap briew.
Ka MHRC ka la ujor sou motu halor ka jingkynnoh ba ka don ka jingbym shimkhia ha Shillong Civil Hospital ha ka por ba la rah ïa ki arngut ki samla pule hapdeng ka jingphlei snam bad ka jingmynsaw kaba jur.
