Shillong, Nohprah, 14: Ka District Magistrate jong ka East Khasi Hills ha ka sngi Palei ka la pynmih ia ka hukum hapoh ka Section 144 jong ka Criminal Procedure Code (Cr.PC), ban pyntip ba la shah tang ia ki Bos kiba kit ia ki passenger bad ia ki kali rit ban iaid lyngba ka jingkieng Damsite.
Ha kane ka hukum ka District Magistrate ka la pyntip ruh ba ki kali MMV/HMV kiba wan na East bad West Jaintia Hills District kin hap ban iaid na Mawryngkneng lyngba ka surok Shillong Bye Pass. Katba ki kali kiba wan na West, South West bad Eastern West Khasi Hills District kin hap ban iaid lyngba ka shnong Pomlakrai ban poi sha Mawryngkneng bad rung sha ka surok Shillong Bye-Pass.
Namar ka jingkyrkieh jong ka kam, ka District Magistrate ka la pyntip ba kane ka hukum kan treikam noh mardor tad haduh ban da pynbna da kumwei pat
Ha kane ka hukum ka District Magistrate ka la phah kopi ruh sha u Superintendent of Police jong ka East Khasi Hills District, da kaba bthah ba un buh ia ka khyrdop talasi kali ha surok lad Mawryngkneng ban rung sha ka surok Shillong Bye-pass bad ha ka shnong Mawiong ban peit ia ka leit ka wan jong ki kali.
