Shillong, Ïaïong, 11: Ki kynthei bar jylla kiba sah ha ki iing tap shiliang ha ka shnong Lumshnong, East Jaiñtia Hills ha ka lynti ban leit sha Bri Shyrnot ki la pynibor da kaba beh ïa kawei ka longkmie Pnar katba ka die jingdie hajan ka jaka ba ki sah.
Kane ka jingjia ka la jia ha ka por kumba 11:00 baje ha ka step sngi Thohdieng.
Kine ki kynthei bar jylla ki da pynpaw ruh ïa ka jingbitar ïa kane ka longkmie da kaba ong ba ka jingwan tyrwa die wai dong jong ka hakhmat ka dukan jong ki sha ki kali kiba ïaid lyngba ka surok ka pynduhnong ïa ki.
Ha ka Video ba la saphriang ha ka social medial la ïohi ruh ba ki kynthei bar jylla ki la kynhied wat ïa ki kali kiba ieng hakhmat dukan jong ki bad ong ba ka dei ka jaka jong ki kaba la ai ba kin sah da u malik jong ki uba dei u Khasi.
Ka MDC jong ka Narpuh Constituency ka Kong Deivipaya Tongper tang shu ïohi ïa ka video ka la hiar mar mar sha katei ka jaka ban tuklar halor ka jingleh baheh bad ka jingkam trai jong ki bar jyllla ïa ka jaka ka puta bad beh ïa ka longkmie Khasi-Pnar kaba die jingdie harud surok.
Hadien ka jingïania, ka MDC ka la dawa ïa kine ki kynthei bar jylla ba kin pyni ïa ka Trading License ba la ai da ka Jaiñtia Hills Autonomous District Council (JHADC) ban plie ïa ka dukan hynrei lym kumta kin hap ban khang mardor ïa ka dukan.
