Shillong, Rymphang 28: Ki don kumba 30 ngut tam ki nongtrei bylla sngi ha ka kyrdan Grade-IV kiba ju trei ha ophis Secretariat, Shillong kum ki Cleaner, Peon, Mali, Chowkidar, Sweeper kiba la shah pynsangeh kam hadien ba ki bor ba dei peit jong kane ka shlem treikam ka Sorkar Jylla ki la pynpaw ba yn ym lah shuh ban dang aikam namarba ka tnat Pla Tyngka jong ka Sorkar Jylla kam don pisa shuh ban siew ïa ka bai bylla sngi ka jong ki.
Kine ki nongtrei bylla sngi ki la phah ruh da ka jingthoh sha u Myntri Rangbah ka Jylla u Conrad K. Sangma, u Myntri uba khmih ïa ka tnat Secretariat Administration Bah AL Hek, sha Chief Secretary ka Jylla Bah DP Wahlang ban sngap ïa ka jingud jingnam ka jong ki.
Ki la don katto katne ngut ki longkmie, ki samla kynthei bad ki longkpa kiba la trei kumba 5 snem haduh 10 snem ha ka sngi Thohdieng ki la pynlong da ka jingïakhih kaba jaijai ha madan Malki, Shilong ban pynpaw ïa ka jingpyrshah halor kane ka jingshah wengkam kaba mynta kim tip shuh kumno kin pyndap ïa la ka jong ka iing ka sem kaba ki ju bsa baroh katta.
“U Nazir uba peit ïa ngi u la ong ba ka jingpynsangeh treikam ka long tang na ka bynta shi bnai hynrei ynda ngi la leit ban ïakynduh biang u ong ka tnat Pla Tyngka kam don pisa. Ngi kyrpad jur ïa ka Sorkar ba kan ïarap lem ïa ngi ba ngin dup lah ban pynbit ïa ka ing ka sem namarba baroh shikatta ngi la trei bad lada ngim ïoh shuh ïa ka jingbylla ngin phah skul shuh da kaei ïa ki khun, ngi siew baiwai iing da kaei,” ong kawei ka longkmie kaba la shah pynsangeh treikam.
Ka la ïathuh ba ka la trei kum ka nongbylla sngi naduh 2014 bad ïathuh ruh ba ki don kiba la trei 5 snem, 7 snem, 8 snem, 9 snem bad 10 snem.
“Kaba pynlyngngoh ïa ka long na Main Secretariat la beh lut hynrei ki dang don sa tang ar ne lai ngut bad ha Additional Secretariat ym pat beh satia hynrei dang bun kiba dang trei. Lada beh te beh lut ïa baroh bad lada buh ruh buh lang ïa baroh. Ngi ruh ngim don kano kano ka jingsngew namarba ka juh ka kam bad kajuh ka jingtrei,” ka la ong.
“U (ophisar) ba mynta u kren da ki ktien ki bym sngewtynnat, long kumba pyndom beit ïa ngi,” la ong kane ka longkmie.
Uwei pat u rangbah uba la trei naduh u snem 2015 la pynpaw ba ki Nazir kiba rim kim shym la pynkhih watla ki la trei bun bun snem hynrei dei tad hadu ban da shimti da uwei pat u Nazir uba thymmai ki mad ïa kane ka apot shah beh kam.
“Lada u ong ba ka tnat Pla Tyngka kam don pisa, kumno ïa kiwei yn don pisa katba ïa ngi ym don pisa. La shiphew snem ngi la trei shaei mynta ngin wadkam nalor ka rta kam shah shuh ban dang wad kam,” u la bynrap.
“Lada ka tnat Pla Tyngka kam don pisa dei ban beh lut ïa baroh,” u la ong.
