Shillong, Jylliew, 01: Saw ki samla kiba ïakhun ïa ka eksamin thungkam Pulit ki la shah pynsangeh na kaba thoh ïa ka eksamin hadien ba la lap ba ki pyndonkam da ka buit shukor wat hadien ba ladep mana ban ym shah satia ban peittuh ne ban pyndonkam ïa kino kino ki rukom leh thok ha kane ka eksamin.
Ha ka eksamin ba la pynlong ha ka sngi Saitjaiñ la lap ïa uwei na East Jaiñtia Hills uba don ïa u Roll No 33032220 uba thoh ïa ka eksamin na ka bynta ka post Driver Fireman bad uwei pat na Eastern West Khasi Hills uba don ïa u Roll Number 33002444 uba thoh ïa ka eksamin na ka bynta ka post Fireman la lap ba ki la pyndonkam da ki buit shukor ha kane ka eksamin.
Katba ha ka eksamin ba la pynlong ha ka sngi U Blei, ha kawei na ki Examination Centre ha East Jaiñtia Hills, arngut ki samla thep kam kiba don ïa u Roll No. 22049407 bad u Roll No. 22022738 la lap ba ki la leh tuh ha ka por ba thoh ïa ka eksamin kaba long kum ka jingpynkheiñ ïa ka ki kyndon ba la pynlong ïa ka eksamin, ong u Inspector General of Police, (SB/Bdr.) Cum Chairman, CRB ka tnat Pulit Meghalaya u Dalton P Marak.
Ïa ka written test la pynlong na ka bynta ka post AB/BNC/MPRO GD/Constable Handyman ha ki district bapher bapher ka jylla.
Ha u kyrwoh ba la phah da u IGP, (SB/Bdr) Cum Chairman ka Central Recruitment Board u Dalton P. Marak u la ong ba wat hadien ba la bthah janai ïa ki kyndon thoh eksamin sha ki nongthoh eksamin, hynrei la lap ba kine ki arngut ki la pyndonkam da ki kam buit tuh ha ka por thoh eksamin kaba long kum ka jingpynkheiñ ïa ki kyndon jong ka eksamin.
U Marak u la pynrem jur ïa kane ka jingleh tuh bad ong ruh ba ka long ka jingleh ka bym lah ban pdiang ha ka Transparent Recruitment Process (TRP) ba la bud ryntih da ka Central Recruitment Board (CRB), ka tnat Pulit Meghalaya.
Ïa ki saw ki arngut la khang ban dang ïashim bynta ha ka jingthep kam ba la pynlong da ka Central Recruitment Board (CRB) bad la kyntait noh mardor ïa ki na ka jingthoh eksamin, la pyntip shuh shuh u Marak.
La pyntip ruh ba kine ki saw ngut lada ki kwah ban phah ïa ka jingkyrpad halor kane ka jingpynmih hukum ki lah ban phah sha ki bor bahalor jong ka Central Recruitment Board lyngba u Superintendent of Police jong ka East Jaiñtia Hills District bad ka Eastern West Khasi Hills kiba peit ïa ka jingpynlong eksamin.
