Shillong, Jylliew, 01: Ka Dorbar Shnong Nongdiengngan bad ka Dorbar Shnong Nongmahir ki la pynpaw ka jingsngewsih namar ka jingpynsangeh noh ka jingtrei ia ka Project Stage-3 ka Meghalaya Power Generation Corporation Limited (MePGCL) hadien ba la kynnoh ba kawei ka kynhun khynra laisen ka la shoh bad bom ia ki nongbylla bar jylla bad ym tang katta la kynnoh ba ka kynhun ka la ktah kti ruh wat ia ki nongbylla Khasi kiba trei ha kane ka projek.
Ki nongialam shnong jong kine ki ar tylli ki dorbar shnong ki la ong ba kane ka jingleh jong ka kynhun khynra Labour License ka la pynduhnong ia ki nongbylla namarba ka kompeni kaba pyntrei ia kane ka projek ka la sangeh trei bad bun ki nongbylla Khasi haduh mynta kim pat ioh ia ka bainong namarba ka bor pyniaid ka kompeni ki la phet noh sha shnong lajong hadien kane ka jingjia.
U Rangbah Shnong ka Shnong Nongdiengngan u Bah Dip Pathaw bad u Secretary ka shnong Nongmahir u Bah J. Thangkhiew ki la ong ba kim pyrshah ia ka jingwan ki sengbhalang ban khynra labour license lada ki wan lyngba ka jingtip jong ka Dorbar Shnong hynrei kumba ka long mynta ka jingleh jong ki, ka la ktah ruh ia ki nongbylla Khasi kiba ioh bylla ha kane ka projek.
Ki la ong ba ka jingpynsangeh noh ia ka jingtrei kan ktah ia ka jingsam bording tang ia ka thain hynrei kan ktah wat ia ka jylla baroh kawei.
Ki la ong ruh ba kim kyrshan ia ki bar jylla kiba wan trei bylla khlem ki kot ki sla bad lada ki kynhun sengbhalang ki khot lang ia ki nongialam shnong bad lada lap ia kino kino ki bym biang ki kot ki sla dei ban beh noh.
“Hynrei ban shu wan leh da ka bor kan ktah jur ia ki trai shnong kiba ioh bylla ha ka project bad ia ka shnong baroh kawei ha kaba bun kiba la ioh jingmyntoi na ka jingdon jong ka project Stage-3 ka MePGCL,” ki la bynrap.
