Shillong, Lber, 11: La ju ong ba ka pule puthi ka dei kaba kordor tam ha ka imlang sahlang hynrei ki don pat ki skul ha ki shnong bapher bapher ba ki nongpynïaid lane ki trai nongseng skul khamtam ki skul shimet ki la shu pynlong tang ki jaka lum spah ban myntoi ka malade.
Ka kynhun lum khubor jong ka Batesi TV ha ka sngi Baar ka la hiar sha ka shong Mawtngam kaba jngai kumba 16 kilomitar eiei ha kaba la lap ïa kawei ka Lower Primary School kaba la jot rathai bad kaba la kylla kum ka sem masi na ka daw ka jingbym shimkhia da ki nongseng ïa kane ka skul.
La ïathuh ba ïa kane ka skul la seng da ki riewshimet bad u Secretary jong kane ka skul u dei uba la tip kum u Bah Philossophar Shangdiar na ka shnong Tynnai.
Haba ïakren bad u Myntri jong ka shnong Mawtngam u Bah Lamphranglin Ïawphniaw ha kaba u la ïathuh ba ki khynnah kiba pule ha kane ka skul ki don kumba 20 ngut bad iwei i nonghikai bad kane ka skul ka don naduh Class-A haduh Class-4.
Kaba kham isangsot eh ka long ba ka iingskul kaba ju pynlong klas ka la dap da ka eit masi suda bad ka tnum iing jong ka skul ka la pei lut. Namarba ka iing skul ka la jot bad ka la dap sa tang da ka eit masi ha ka kamra klas kumta la hap ban pynlong klas noh ha ka iingshet ja sngi jong ki khynnah skul bad lada jur palat u slap la hap ban pynlong klas noh wat ha iing ki Briew.
U Bah Lamphranglin Ïawphniaw u la ïathuh ba la seng ïa kane ka skul Lower Primary naduh ki snem 1980 eiei bad ka shnong ka la pyrshang ruh ban pan na u nongseng ïa ka skul ban pynïaid noh da ka bor shnong hynrei u nongseng um shym la treh satia ban aiti noh ïa kane ka skul sha ka shnong.
U la ïathuh ruh ba ki nongseng jong ka skul ki la pyrshang ban pan jingïarap na ki bor ba dei khmih ïa ki skul hynrei kim shym la ïoh satia.
Shuh shuh la ong kane ka skul ka la ïoh ïa ka skhim Mid-day Meal hynrei kane ka skhim ka la shu jah noh khlem ïoh jingtip shuh bad kumjuh wat u nongshet ja ngi naduh u snem 1996 haduh mynta um shym la ïoh jingsiew satia.
