Shillong, Rymphang, 28: U Bah Thombor Shiwat uba dei u MDC jong ka Moodop-Umladang District Council Constituency ha ka sngi Thohdieng u la shah jied biang ha ka wat kaba lai kum u Chief Executive Member (CEM) jong ka Jaiñtia Hills Autonomous District Council (JHADC).
Ka Voice of the People Party (VPP) kaba don 8 ngut ki MDC kiba shong ha ka Liang Pyrshah kim shym la ïashim bynta ha ka jingjied ïa u CEM ba thymmai.
Shwa ka elekshon jied CEM ka la don shwa ka jingjied ïa u Chairman ba la pynïaid da u Deputy Commissioner jong ka West Jaiñtia Hills u A.K. Singh ha kaba la ïakhun da u Dr. Sankey Shangpung u MDC jong ka Bataw Lakadong bad u Rikut Parein uba long u MDC na Saphai -Sahsniang.
Ha ka jingïajied ïa u Chairman baroh ki MDC ka JHADC ki la ïashim bynta lang ha ka jingïathep vote da ka Secret Ballot ha kaba u Dr. Sankey Shangpung ula jop da 20 Vote katba u Bah Rikut Parein ula ïoh tang 6 Votes bad 3 tylli ki vote ki dei kiba la thep ïa u NoTA.
Ka NPP ka don 14 ngut ki MDC ryngkat ka jingïatreilang ki 3 ngut ki MDC na ka UDP bad u Bah Moonlight Pariat uba long u MDC Independent.
Ka VPP kaba don 8 ngut ki MDC ka la rai ban shong beit ha ka Liang Pyrshah hapoh ka jingïalam jong u Bah Awhai Andrew Shullai kum u Nongïalam ka Liang Pyrshah.
Katba ha Khasi Hills Autonomous District Council (KHADC) u MDC jong ka Langkyrdem Laitkorh Bah Shemborlang Rynjah u la shah jied kum u CEM ba thymmai bad u MDC ka Mawkhar-Pynthorumkhrah Constituency Bah Strong Pillar Kharjana u la shah jied kum u Chairman ba thymmai khlem da don mano mano ruh ba ïaleh pyrshah.
La pynïaid ïa ka jingïathep vote da ka Deputy Commissioner ka East Khasi Khasi ka Kong RM Kurbah.
