Shillong, ïaïong, 12: Ka Confederation of Meghalaya Social Organisations (COMSO), kaba long ka kynhun jong ki sengbhalang bapher bapher na rilum Khasi, Jaiñtia bad Garo ha ka sngi Saitjaiñ ka la jied ïa u President jong ka HYC u Bah Roy Kupar Synrem kum u nongïalam jong ka kynhun.
Ki kynhun bapher bapher kiba don haph ka shatri jong ka CoMSO ki long ka Hynñiewtrep Youths’ Council (HYC), Jaiñtia National Council (JNC), Jaiñtia Students Movement (JSM), Confederation of Ri-Bhoi People (CORP), Garoland State Movement Committee (GSMC), A’chik Holistically Integrated Krima (ACHIK), A’chik Progressive Approach (APA), bad ka A’chik Socio-Economic Justice Forum (UASCJF).
Ha ka jingïalang kaba la long ha nongbah Tura, ki dkhot jong Core Committee jong ka CoMSO ki long u Bah Roykupar Synrem uba la shah jied kum u Chairman, katba u Bah Sambormi Lyngdoh, President jong ka Jaiñtia National Council (JNC), bad u Roger D. Shira, u President jong ka A’chik Progressive Approach (APA) ki la shah jied kum ki Vice-Chairmen. U Balbina Ch. Marak, uba long u Acting Chairman jong ka Garoland State Movement Committee (GSMC) u la shah jied kum u General Secretary, u Bah Bandari Ryntathiang, President jong ka Confederation of Ri-Bhoi People (CORP) lem bad u Bah Roytre Dkhar General Secretary jong ka Jaiñtia Students Movement (JSM), ki la shah jied kum ki Additional General Secretary.
Nalor kine, la jied ruh ïa ki Organising Secretary na ka bynta kawei pa kawei ka thain: U Jacius Sangma na ka bynta ka rilum Garo, u Rhembor G Saibon na ka bynta ka rilum Khasi bad u Nanshua Sutnga na ka bynta ka rilum Jaiñtia.
Ïa ka kam Publicity Secretary la bynshet ha u Jubanjoy Swer bad u Tony Marak na ka bynta ka Khasi & Jaiñtia Hills bad ka Garo Hills.
La jied ruh ïa u Cherian Momin, uba long u nongtrei mon sngewbha bad u nongsaid aiñ kum u Official Adviser jong ka COMSO.
