Shillong, Naitung 17 : Ki pulit ka East Khasi Hills ki la leit khynra ha ki bynta bapher bapher jong ka nongbah Shillong kum ha Motphran, Paltan Bazar, Mawblei, Nongrim Hills, Ïew Laitumkhrah, Mawlonghat, Urkaliar, Upper Shillong, Polo, Mawbah , Jhalupara bad Upper Mawprem. Ha kane ka jingleit khynra jong ki, ki la ioh ban kurup haduh 1,12,097 ml ka kyiad phareng bad 7,74,000 ml ka kyiad pyrsi.
Ki pulit ki la leit khynra ruh ha Khyndailad bad ki la ioh kem 15 ngut ki thei die met bad la pynngat ia ki hapoh ki kyndon ain jong ka Immoral Trafficking Pevention Act. Ka kyrwoh na u Superintendent of Police ka East Khasi Hills u Bah Sylvester Nongtnger ka la pyntip ruh ba ki pulit ki la khynra bad sngi bad miet ban lap ia ki briew kiba buaid ha ka por niah kali, kiba niah thuk thuk khlem helmet, bad kiba tah iit iong ha ki kali jong ki. Ki la don haduh 277 tylli ki kali kiba shah bat bad ka kuna ba kla ioh lum na ki -ka long 2,36,500 tyngka.
