Shillong, Naiwieng, 08: Ka Special Cell jong ka tnat Pulit ka East Khasi Hills District ha ka lah sngi U Blei kiba la pynlong ka jingpynap shrip ki la iohkem ia ki lai ngut ki snar nonglute na ka kynhun ‘Gang’ kiba donkti ban rahbor ia ki nongñiah trok kiba kit ban shalan ia u jhur.
U Superintendent of Police (City) East Khasi Hills District Bah Vivek Syiem ha u kyrwoh ba la phah sha ki lad pathai u la iathuh, hadien ba ki Pulit ki la ioh jingtip ba ka don kawei ka kynhun ‘Gang” kaba pynbiej ia uwei u nongñiah trok bad pynbor ia ki trai ban thied ia u jhur ha ka dor kaba tad. U SP u la iathuh ba kane ka kynhun ki snar lute ka la ialam ia u nongñiah trok shajan ISBT ne Umiam na ka bynta ban leit kit ia u jhur. Hynrei, kane ka kynhun Gang ka la rahbor pynban ia u nongñiah trok sha kawei ka jaka khlaw bad pynbor ia u nongñiah trok ban pyntip sha u trai ba ladep kit ia u jhur bad ban phah ia ka pisa lyngba ka Google pay ban siew sha ki nongdie jhur kiba dei pynban ki nongrahbor.
U SP (City) u la ong, da ka jingiarap jong ki dkhot ka Meghalaya Traders Fresh Vegetable & Ginger Association (MTFVGA) bad ka Khasi Jaiñtia Fresh Vegetable Suppliers Association (KJGVSA) ki Pulit ka Special Cell ka East Khasi Hills ki la pynlong ka jingkhynra ha ka 6 tarik mynta u bnai bad mar mar ki la ioh ban kem ia ki lai ngut ki briew na surok Mawlai By-Pass hadien ba ki la kit ia u nongñiah trok na Lad Smit bad pynbor ia u ban pyntip sha u trai lyngba ka telephone ba un siew ia ka pisa.
Kane ka kynhun ‘Gang’ ka la leh ia kane kajuh ka kam runar la bun bun sien ha kaba la bthah ban ujor ejahar bad ban rejister ia ka ejahar, la iathuh u SP.
Ki Pulit ka Special Cell ki dang pynlong ia ka jingthwet kaba jur ia kiwei pat ki dkhot jong kane ka kynhun ki nonglute kiba dang phet rieh ban lait na ka kti ki Pulit.
Ki Pulit ki la ioh kurup saw tylli ki mobile phone bad kawei ka kali Maruti Swift Dzire ba la pyndonkam da ki lai ngut ki snar nonglute.
U SP (City) u la pyntip ruh ba ym pat lah ban tip la kine ki lai ngut ki don kti ne em ha kiwei kiwei ki kam runar.
Ki Pulit ki la register case ha Madanrting Police Station hapoh ka Section 419/420/511/364A/384/340/34 Indian Penal Code (IPC) bad ka jingtohkit ka dang iaid shakhmat.
